మహేష్ కోసం వినాయక్.. కష్టమే !
సూపర్ స్టార్ మహేష్ బాబుతో ఓ సినిమా చేసేందుకు మాస్ దర్శకుడు వి.వి వినాయక్ ఆసక్తిని చూపుతున్నట్టు తెలుస్తోంది. కొందరైతే.. ఇప్పటికే వినాయక్’తో సినిమాకు మహేష్ గ్రీన్ సిగ్నల్ ఇచ్చేశాడని చెప్పుకొంటున్నారు. మెగాస్టార్ చిరంజీవి 150వ సినిమా ‘ఖైదీ నెం.150’ బ్లాక్ బస్టర్ హిట్’తో వినాయక్ తిరిగి ఫాంలోకి వచ్చేశాడు. ప్రస్తుతం మెగా యంగ్ హీరో సాయిధరమ్ తేజుతో ఓ సినిమా చేస్తున్నారు.
ప్రస్తుతం మహేష్ బాబు కొరటాల శివ దర్శకత్వంలో తెరకెక్కుతోన్న “భరత్ అను నేను” సినిమాతో బిజీగా ఉన్నాడు. ఆ తర్వాత వంశీపైడి పల్లి దర్శకత్వంలో మహేష్ 25వ సినిమా తెరకెక్కనుంది. ఇప్పటికే ఈ సినిమా ప్రీ-ప్రొడక్షన్ పనులు మొదలయ్యాయి. వచ్చే యేడాది ఫిబ్రవరి నుంచి సినిమాని సెట్స్ మీదకు తీసుకెళ్లనున్నారు. దిల్ రాజు, అశ్వినీదత్ లు కలిసి సంయుక్తంగా మహేష్ సినిమాని నిర్మించనున్నారు.
వంశీ సినిమా తర్వాత మహేష్’తో సినిమా చేసేందుకు దర్శకధీరుడు ఎస్.ఎస్ రాజమౌళి రెడీగా ఉన్నాడు. ఒకవేళ రాజమౌళి లేటు చేసిన మహేష్ కోసం బోయపాటి శ్రీను, సుకుమార్ లాంటి దర్శకులు కథలు రెడీ చేసుకొని మరీ కూర్చొని ఉన్నారు. ఈ నేపథ్యంలో.. మహేష్ తో వినాయక్ సినిమాపై వస్తున్న వార్తలో నిజం లేకపోవచ్చనే చెప్పుకొంటున్నారు. ఒకవేళ మహేష్-వినాయక్ కాంబో కుదిరిన అది.. మాస్ ప్రేక్షకులకు పండగే.. !
