ఓయూలో ఆత్మ‌హ‌త్య..! యూనివ‌ర్శిటీలో టెన్ష‌న్ టెన్ష‌న్.. !?
ఉద్య‌మాల గడ్డ ఉస్మానియా యూనివ‌ర్శిటీలో విద్యార్థి ఆత్మ‌హ‌త్య చేసుకున్నాడు. ఓయూలోని మానేరు హాస్ట‌ల్ రూమ్ నంబ‌ర్ 159లో ఉంటున్న ముర‌ళి అనే వ్యక్తి బాత్రూంలో ఆత్మ‌హ‌త్య చేసుకున్నాడు. సిద్దిపేట జిల్లా జ‌గ‌దేవ్ పూర్ మండ‌లం దౌలాపూర్ ముర‌ళి స్వ‌స్థ‌లం. ఎమ్మెస్సీ ఫిజిక్స్ మొద‌టి సంవ‌త్స‌రం చ‌దువుతున్న ముర‌ళి ఆత్మ‌హ‌త్య‌తో ఒక్కసారిగా ఉస్మానియా వాతావ‌ర‌ణం వేడెక్కింది.
కేసీఆర్ ప్ర‌భుత్వంలో కొలువులు రావ‌డంలేద‌నే మ‌న‌స్తాపం చెంది ముర‌ళి ఆత్మ‌హ‌త్య చేసుకున్నాడ‌ని చెబుతున్నారు. తెలంగాణ రాష్ట్రం ఏర్ప‌డి మూడున్న‌ర సంవ‌త్స‌రాలైనా ప్ర‌భుత్వ ఉద్యోగం రాలేద‌నే ముర‌ళి ఆత్మ‌హ‌త్య చేసుకున్నాడంటూ విద్యార్థులు ఆందోళ‌న చేప‌ట్టారు.
సోమ‌వారం టీజేఏసీ త‌ల‌పెట్టిన కొలువుల‌కై కొట్లాట స‌భ ఉన్న నేప‌థ్యంలో ఇలాంటి ఘ‌ట‌న చోటుచేసుకోవ‌డంతో ఓయూలో ఒక్కసారిగా వాతావ‌ర‌ణం మారిపోయింది. యూనివ‌ర్శిటీలో ఎలాంటి అవాంఛ‌నీయ సంఘ‌ట‌న‌లు చోటుచేసుకోకుండా పోలీసులు భ‌ద్ర‌త ఏర్పాటు చేస్తున్నారు.
