రజనీ, మహేష్.. ఒకే చోట !
సూపర్ స్టార్స్ ఇద్దరూ ఒకేచోట చేరారు. రజనీకాంత్, మహేష్ బాబుల సినిమాల షూటింగ్ ఒకే సమయంలో డెహ్రాడూన్ లో జరుగుతుండటం విశేషం. కార్తీక్ సుబ్బరాజు దర్శకత్వంలో రజనీ సినిమా తెరకెక్కుతోన్న సంగతి తెలిసిందే. ఇప్పుడీ సినిమా షూటింగ్ డెహ్రాడూన్ లో జరుగుతోంది. టాలీవుడ్ సూపర్ స్టార్ మహేష్ కూడా తన 25వ షూటింగ్ కోసం డెహ్రాడూన్ చేరారు. వంశీ పైడిపల్లి దర్శకత్వంలో మహేష్ 25వ సినిమా తెరకెక్కనున్న సంగతి తెలిసింది. ఈ సినిమా తొలి షెడ్యూల్ ని డెహ్రాడూన్ లో ప్లాన్ చేశారు. ఈరోజు నుంచే షూటింగ్ ప్రారంభం కానుంది. ఒకే చోట షూటింగ్ లో పాల్గొంటున్న రజనీ, మహేష్ కలిసే ఛాన్స్ ఉందంటున్నారు. ఇదే జరిగితే.. సూపర్ స్టార్ ఇద్దరిని ప్రక్కపక్కనే చూసుకొనే అవకాశం అభిమానులకు దక్కనుంది.
కబాలి, కాలా సినిమాల తర్వాత రజనీ చేస్తున్న చిత్రమిది. రజనీ కోసం దర్శకుడు కార్తీక్ సుబ్బరాజు రెడీ చేసుకొన్న కథ అద్భతంగా ఉందని చెబుతున్నారు. ఈ సినిమాలో రజనీకి విలన్ గా విజయ్ సేతుపతి కనిపించనున్నారు. ఇక, ‘భరత్ అను నేను’ బ్లాక్ బస్టర్ హిట్ తర్వాత వంశీపైడి పల్లి దర్శకత్వంలో తన 25వ సినిమాని సెట్స్ మీదకు తీసుకెళ్తున్నాడు మహేష్. వంశీ చెప్పిన కథ మహేష్ బాగా నచ్చిందని చెబుతున్నారు. ఇందులో కామెడీ హీరో అల్లరి నరేష్ కీలక పాత్రలో కనిపించబోతున్నారు. మహేష్ సరసన పూజా హెగ్డే జతకట్టనుంది. సూపర్ స్టార్స్ సినిమాలు ఒకే చోట షూటింగ్ జరుపుకుంటున్నాయి. మరీ.. ప్రేక్షకుల ముందుకు కూడా ఒకేసారి వస్తాయా.. ? హిట్ కొడతాయా.. ?? అన్నది చూడాలి.
