ఇంగ్లాండ్‌తో భారత్ ఢీ.. తొలి టీ20 నేడు !
కోహ్లీ సేన అసలు పోరుకు సిద్ధమైంది. ఇంగ్లాండ్’లో టీమిండియా పర్యటన రెండు నెలలకుపైగా సుదీర్ఘంగా సాగనున్న సంగతి తెలిసిందే. ఈ పర్యటనలో ఇంగ్లాండ్‌తో టీమ్‌ఇండియా 3 టీ20లు, 3 వన్డేలు, 5 టెస్టులు ఆడుతుంది. 2019 ప్రపంచకప్‌కు ఇంగ్లాండ్ ఆతిథ్యమిస్తుండటంతో ఈ పర్యటన టీమ్‌ఇండియా కీలకంగా మారనుంది. ఇక, మూడు టీ20ల సిరీస్‌లో భాగంగా మంగళవారం భారత్ తొలి టీ20 మ్యాచ్‌లో ఇంగ్లాండ్‌ను ఢీకొనబోతోంది. మాంచెస్టర్‌ వేదికగా జరగనున్న ఈ మ్యాచ్ రాత్రి 10 నుంచి సోనీ సిక్స్‌లో లో ప్రసారం కానుంది.
పొట్టి సిరీస్‌లో టీమ్‌ఇండియానే ఫేవరెట్‌గా కనిపిస్తోంది. గత 20 టీ20ల్లో 15 మ్యాచ్‌ల్లో టీమ్‌ఇండియాదే విజయం. ఐతే, సొంతగడ్డపై 5 వన్డేలు, ఏకైక టీ20లో ఆసీస్‌ను చిత్తుగా ఓడించిన ఇంగ్లాండ్ జట్టులో ఉత్సాహం ఉరకలెత్తుతోంది. ఈ నేపథ్యంలో ఆతిథ్య జట్టును ఓడించడం భారత్‌కు అంత తేలికేమీ కాదని క్రికెట్ పండితులు చెబుతున్నారు. మొత్తానికి.. భారత్-ఇంగ్లాండ్ ల మధ్య పోరు రసవత్తరంగా సాగనుంది.
