ఆ కంపెనీకి మహేష్ సీఈవో ?
సూపర్ స్టార్ మహేష్ 25 గురించి రోజుకో ఆసక్తికరమైన అప్ డేట్ వస్తోంది. సినిమాలో మహేష్ గెడ్డెం లుక్ లో కనిపిస్తాడు. ఆయన కాలేజీ స్టూడెంట్ గా కనిపించబోతున్నాడనే ప్రచారం మొదట్లో జరిగింది. ఈ రెండు నిజమేనని ఆ తర్వాత తేలిపోయింది. ప్రస్తుతం ఈ సినిమా మొదటి షెడ్యూల్ డెహ్రాడూన్ లో జరుగుతోంది. అక్కడ మహేష్ కాలేజీ స్టూడెంట్ గా కనిపించే సన్నివేశాలని చిత్రీకరిస్తున్నారు. ఈ ఏపీసోడ్ సినిమాకే హైలైట్ గా నిలుస్తుందని చెబుతున్నారు.
తాజాగా, మహేష్ 25 గురించి మరో ఆసక్తికరమైన విషయం బయటికొచ్చింది. ఇందులో మహేష్ ఓ అమెరికన్ కంపెనీకి సీఈవోగా కనిపించబోతున్నారట. స్టూడెంట్ టు సీఈవో లింకు ఎక్కడ కుదురుతుంది అనే అనుమానాలు రావడం సహజం. ఐతే, మహేష్ స్టూడెంట్ గా కనిపించే ఏపీసోడ్ ఫ్లాష్ బ్యాక్ లో చూపిస్తాడట దర్శకుడు వంశీపైడిపల్లి. స్క్రీన్ ప్లే అద్భుతంగా ఉంటుంది. మహేష్ సినిమా కోసం వంశీ బాలీవుడ్ దర్శకుడు రాజ్ కుమార్ హిరాని స్టయిల్ ని ఫాలో అవుతున్నారని చెబుతున్నారు.
డెహ్రీడూన్ షెడ్యూల్ తర్వాత మహేష్ 25 తదుపరి షెడ్యూల్ హైదరాబాద్ లో జరగనుంది. ఈ సినిమాలో మహేష్ సరసన పూజా హెగ్డే జతకట్టనుంది. ‘సమ్మోహనం’ హీరోయిన్ అదితి రావ్ కీలక పాత్రలో కనిపించనుంది. కామెడీ హీరో అల్లరి నరేష్ మహేష్ స్నేహితుడుగా కనిపించనున్నాడు. ఈ చిత్రానికి సంగీతం దేవి శ్రీ ప్రసాద్. అశ్విని దత్, దిల్ రాజు, పివిపి సంయుక్తంగా నిర్మిస్తున్నారు.
