‘యాత్ర’ టీజర్ టాక్
దివంగత ముఖ్యమంత్రి వై.ఎస్‌ రాజశేఖర్‌ రెడ్డి జీవితం కథ ‘యాత్ర’ పేరిట తెరకెక్కుతోన్న సంగతి తెలిసిందే. మలయాళ సూపర్ స్టార్ మమ్ముట్టి వైఎస్సార్‌ పాత్ర పోషిస్తున్నారు. మహి వి రాఘవ్‌ దర్శకత్వం వహిస్తున్నారు. ఈ రోజు (జులై 8) వైఎస్‌ఆర్‌ జయంతి సందర్భంగా ‘యాత్ర’ టీజర్‌ను విడుదల చేశారు. ‘తెలుసుకోవాలని ఉంది. వినాలని ఉంది. ఈ కడప దాటి ప్రతీ గడపలోకి వెళ్లాలని ఉంది. వారితో కలిసి నడవాలని ఉంది. వాళ్ల గుండెచప్పుడు వినాలని ఉంది. గెలిస్తే పట్టుదల అంటారు. ఓడిపోతే మూర్ఖత్వం అంటారు. ఈ పాదయాత్ర నా మూర్ఖత్వమో పట్టుదలో చరిత్రే నిర్ణయించబోతోంది’ అని మమ్ముట్టి యాత్రకు బయలు దేరుతున్నట్టు ఓ సీన్ ని టీజర్ గా వదిలారు.
వైఎస్ అభిమానులని టీజర్ ఆకట్టుకొనేలా ఉంది. మమ్ముటి నడక, ఆ చేయి ఊపుడు అచ్చం వైఎస్ ని గుర్తుకు తెస్తుంది. ‘యాత్ర’లో వైఎస్ సన్నిహితుడు సూరీడు పాత్రలో పోసాని కృష్ణ మురళి, మాజీ హోంమంత్రి సబితా ఇంద్రా రెడ్డి పాత్రలో సుహాసిని, వైఎస్ కుమార్తె షర్మిళ పాత్రలో భూమిక, వైఎస్ తండ్రి రాజారెడ్డి పాత్రలో జగపతిబాబు కనిపించబోతున్నట్టు సమాచారమ్. ఈ సినిమాని శివ మేక సమర్పణలో 70 ఎంఎం ఎంటర్‌టైన్‌ మెంట్స్‌ పతాకంపై సినిమాను నిర్మిస్తున్నారు.
