మహేష్’తో రకుల్ రొమాన్స్.. ముందే లీకు.. !
సూపర్ స్టార్ మహేష్ బాబుతో స్టార్ హీరోయిన్ రకుల్ ప్రీత్ సింగ్ రొమాన్స్.. ముందే లీకైంది. మహేష్ అంటే రకుల్ కి పిచ్చి. ఆయనతో ఒక్కసారైనా జతకట్టనిదే పెళ్లి కూడా చేసుకోనంది అప్పట్లో. బహుశా.. ఆ మాటలు వినే కాబోలు ‘సైడర్’లో ఆమెకు అవకాశం ఇచ్చారేమో.. ! ఈ సినిమా ఫలితం పక్కన పెడితే.. మహేష్-రకుల్ జంట బాగా కుదిరింది. వీరి మధ్య కెమెస్ట్రీ బాగా వర్కవుట్ అయ్యిందని చెప్పుకొన్నారు. ఐతే, ఇప్పుడు మరోసారి మహేష్ తో రొమాన్స్ చేయనుందట రకుల్. ఆ విషయం కాస్త ముందుగానే లీకైంది.. !
ప్రస్తుతం మహేష్ వంశీపైడి దర్శకత్వంలో తెరకెక్కుతోన్న తన 25వ సినిమాతో బిజీగా ఉన్నాడు. ఈ సినిమా తర్వాత సుకుమార్ దర్శకత్వంలో మహేష్ మరో సినిమా చేయబోతున్నాడు. ప్రస్తుతం సుక్కు మహేష్ సినిమా స్క్రిప్టుని పూర్తి చేసే పనిలో ఉన్నాడు. ఐతే, ఈ సినిమా కోసం హీరోయిన్ గా రకుల్ ప్రీత్ సింగ్ ని తీసుకోవాలని సుక్కు భావిస్తున్నాడట. ఇటు మహేష్, అటు సుకుమార్ తో కలిసి పని చేసిన అనుభవం రకుల్ కు ఉంది. సుకుమార్ దర్శకత్వంలో వచ్చిన తారక్ ‘నాన్నకు ప్రేమతో’, మహేష్ ‘సైడర్’లోనూ రకుల్ హీరోయిన్ గా చేసిన సంగతి తెలిసిందే. దీంతో సుక్కు-మహేష్ సినిమా కోసం రకుల్ ని తీసుకోబోతున్నట్టు తెలిసింది.
సుకుమార్ దర్శకత్వంలో వచ్చిన మహేష్ ‘వన్ నేనొక్కడినే’ ఆశించిన స్థాయిలో ఆడలేదు. అయినా.. మహేష్ తనకు రెండో అవకాశం ఇవ్వడం పట్ల సుకుమార్ సంతోషంగా ఉన్నాడు. ఈసారి మహేష్ కచ్చితంగా హిట్ ఇవ్వాలనే పట్టుదలతో ఉన్నాడు. మరీ.. అందులో ఏ మేరకు సక్సెస్ అవుతాడన్నది చూడాలి. ఈ చిత్రాన్ని మైత్రీ మూవీ మేకర్స్ నిర్మించనుంది.
