విజయ్ దేవరకొండ పాడిన పాట డిలీట్.. !
విజయ్ దేవరకొండ – రష్మిక మందన జంటగా నటించిన చిత్రం ‘గీత గోవిందం’. పరశురాం దర్శకుడు. ఈ రొమాంటిక్ ఎంటర్ టైనర్ ఆగస్టు 15న ప్రేక్షకుల ముందుకు రానుంది. ఈ సినిమాలో విజయ్ దేవరకొండ ఓ పాటని పాడటం విశేషం. ఆ పాటని ఇటీవలే విడుదల చేశారు. ‘అమెరికా గర్లైనా.. అత్తిగర్లైనా.. ’ అనే పాటని విజయ్ హుషారుగా పాడారు. ఐతే, ఇప్పుడీ సాంగ్ యూట్యూబ్ నుంచి తొలగించారు. విడుదల చేసిన రెండు రోజులకే డిలీట్ చేయడం హాట్ టాపిక్ గా మారింది. ఐతే, దీనిపై చిత్రబృందం వివరణ ఇచ్చింది.
‘ఈ పాటలోని కొన్ని పదాలు ఇతరుల మనోభావాలు దెబ్బతీసేలా అసభ్యకరంగా ఉన్నాయంటూ పలువురు నెటిజన్లు అభ్యంతరం వ్యక్తం చేస్తున్నారు. పాటలోని పదాలను తప్పుగా అర్థం చేసుకున్నారే తప్ప ఎవ్వరినీ కించపరచాలన్నది మా ఉద్దేశం కాదు. ఏదేమైనప్పటికీ అందరి మనోభావాలను గౌరవించడం మా ప్రాథమిక ధర్మం. అందుకే పాటలో అభ్యంతరకర పదాలను తొలగించి మార్పులు చేస్తున్నాం. ఆ తర్వాత మళ్లీ పాటను యూట్యూబ్‌లో విడుదల చేస్తాం’’ అని చిత్రబృందం. తెలిపింది.
ఇక, ఈ నెల 29న ఈ సినిమా ఆడియో వేడుకను నిర్వహించబోతున్నారు. ఈ వేడుకకు అల్లు అర్జున్‌ ముఖ్య అతిథిగా రాబోతున్నారు. ఈ చిత్రానికి సంగీతం గోపీ సుందర్‌. జీఏ2 పిక్చర్స్‌ పతాకంపై బన్నీ వాసు నిర్మించారు.
