ప్రభాస్ దొంగ, శ్రద్దా పోలీస్ !
బాహుబలి’ తర్వాత యంగ్ రెబల్ స్టార్ ప్రభాస్ ‘సాహో’ సినిమాతో బిజీ అయిపోయాడు. సుజీత్ దర్శకత్వంలో తెరకెక్కుతోన్న యాక్షన్ థ్రిల్లర్ ఇది. కళ్లు చెదిరే యాక్షన్ సన్నివేశాలు, అల్ట్రా మోడ్రన్ హంగులతో ‘సాహో’ చిత్రం అందరిలో ఉత్కంఠ రేపుతోంది. ఇప్పుడీ సినిమాలో హీరో-హీరోయిన్ పాత్రలు లీకయ్యాయి. సినిమాలో ప్రభాస్ పెద్ద దొంగగా, ఆ దొంగని పట్టుకొనే పోలీసాఫీసర్ గా శ్రద్దా కపూర్ కనిపించబోతున్నట్టు సమాచారమ్.
సినిమాలో ప్రభాస్ ఇంటర్నేషనల్ దొంగగా కనిపిస్తాడట. పలు దేశాల్లో పురాతన వజ్రాలు దొంగిలిస్తూ పోలీసులు కంట పడకుండా తిరుగుతుంటాడు. ఇతడి వలన పలు దేశాల్లో ఇంటర్ పోల్ అధికారులకు కంటిమీద కునుకు ఉండదు. ఇక, ప్రభాస్ ని పట్టుకోవడానికి ప్రయత్నించే పోలీస్ ఆఫీసర్ పాత్రలో హీరోయిన్ శ్రద్దా కపూర్ కనిపించబోతుందట. ఊహించని మలుపులు, ఉత్కంఠ రేకెత్తించే పోరాట సన్నివేశాలతో ఈ చిత్రాన్ని దర్శకుడు సుజిత్ ఆసక్తికరంగా మలుస్తున్నాడని చెప్పుకొంటున్నారు.
ప్రస్తుతం ఈ సినిమా హైదరాబాద్ రామోజీఫిల్మ్ సిటీలో షూటింగ్ జరుపుకుంటోంది. దాపు రూ. 300కోట్ల భారీ బడ్జెట్ తో ప్రభాస్ సొంత బ్యానర్’గా పిలవబడే యూవీ క్రియేషన్స్ ఈ చిత్రాన్ని నిర్మిస్తోంది. హాలీవుడ్, బాలీవుడ్ కు చెందిన నటులు, టెక్నీషన్స్ సాహో కోసం పని చేస్తున్నారు. మందిర బేడీ, ఎవిలిన్ శర్మ, అరుణ్ విజయ్ వంటి నటులు కీలక పాత్రలో నటిస్తున్నారు. ఈ చిత్రాన్ని వచ్చే యేడాది ప్రేక్షకుల ముందుకు తీసుకురానున్నారు.
