టాలీవుడ్’పై కేరళ ఎఫెక్ట్

భారీ వర్షాలు, వరదలతో కేరళని అతలాకుతలం అవుతోంది. ఇప్పుడీ ఎఫెక్ట్ టాలీవుడ్ పై పడింది. పలు తెలుగు సినిమాలు విడుదల వాయిదా పడేలా కనిపిస్తున్నాయి. ఇప్పటికే ఈ నెల 31న ప్రేక్షకుల ముందుకు రావాల్సిన నాగ చైతన్య ‘శైలాజారెడ్డి అల్లుడు’ వాయిదా పడింది. ఈ సినిమాకు మలయాళ సంగీత దర్శకుడు గోపి సుందర్ సంగీతమందిస్తున్నారు. దీంతో రీరికార్డింగ్ కేరళలోనే జరుగుతోంది.

ఈ సినిమా పోస్ట్ ప్రొడక్షన్ పనులు ఇంకా పూర్తి కాలేదు. ఈ విషయాన్ని తెలుపుతూ నాగ చైతన్య ట్విట్ చేశారు. “కేరళలో నెలకొన్న దారుణ పరిస్థితుల వల్ల సినిమా రీరికార్డింగ్ ను అనుకున్న సమయంలో పూర్తి చేయలేకపోయాం. రీరికార్డింగ్ కేరళలోనే జరుగుతోంది. పోస్ట్ ప్రొడక్షన్ పనులు పూర్తి కాలేదు. త్వరలోనే విడుదల తేదీని ఖరారు చేసి, ప్రకటిస్తాం’ అంటూ చైతూ ట్వీట్ చేశాడు.

ఈ ఒక్క సినిమాయే కాదు. పలు తెలుగు సినిమాలకు మలయాళ నటులు, టెక్నిషియన్స్ పనిచేస్తున్నారు. ప్రస్తుతం కేరళలో వరదల కారణంగా వీరంతా అందుబాటులో ఉండలేకపోతున్నారు. దీంతో తెలుగు సినిమాల షూటింగ్స్ కి ఇబ్బంది కలుగుతుందని చెబుతున్నారు. ఈ నేపథ్యంలోనే కేరళ ఎఫెక్ట్ టాలీవుడ్ పై గట్టిగానే పడుతుందని దర్శక-నిర్మాతలు చెబుతున్నారు.