కొండగట్టులో ఆర్టీసీ బస్సు బోల్తా.. 32మంది మృతి !
జగిత్యాల జిల్లా కొండగట్టు ఘాట్‌ రోడ్డులో ఘోర రోడ్డు ప్రమాదం చోటుచేసుకుంది. ఘాట్‌రోడ్డులోని మలుపు వద్ద ఆర్టీసీ బస్సు అదుపుతప్పి బోల్తా పడింది. ఈ ఘటనలో 32 మంది మృతిచెందినట్లు సమాచారమ్. మరో 20 మందికి తీవ్ర గాయాలయ్యాయి. క్షతగాత్రులను జగిత్యాల ఆస్పత్రికి తరలిస్తున్నారు. స్థానికులు, అధికారులు, పోలీసు సిబ్బంది సహాయక చర్యలు చేపట్టారు. ఈ ప్రమాదంపై ముఖ్యమంత్రి కేసీఆర్‌ తీవ్ర దిగ్భ్రాంతి వ్యక్తం చేశారు. క్షతగాత్రులకు మెరుగైన వైద్యం అందించాలని, ఘటనా స్థలంలో సహాయక చర్యలు ముమ్మరం చేయాలని అధికారులను ఆదేశించారు.
జగిత్యాల డిపోకు చెందిన ఆర్టీసీ బస్సు కొండగట్టు ఘాట్‌రోడ్డుపైకి ఎక్కుతున్న సమయంలో ఈ ఘటన చోటుచేసుకుంది. ప్రమాద సమయంలో బస్సులో సుమారు 60 మందికి పైగా ఉన్నట్లు తెలుస్తోంది. ప్రయాణికులందరూ డ్రైవర్‌ వైపు మళ్లడంతో బస్సు అదుపుతప్పి లోయలోకి పడినట్లు తెలుస్తోంది. ప్రమాద సమాచారం తెలియగానే జగిత్యాల జిల్లా కలెక్టర్‌ శరత్‌, ఎస్పీ సింధూశర్మ హుటాహుటిన అక్కడికి చేరుకున్నారు.
