కేసీఆర్ బయోపిక్’లో నటిస్తా
టాలీవుడ్ లో బయోపిక్ ల ట్రెండు మొదలైంది. ‘మహానటి’ సావిత్రి బయోపిక్ బ్లాక్ బస్టర్ హిట్ కావడంతో.. మరిన్ని బయోపిక్ ల కోసం ప్రయత్నాలు జరుగుతున్నాయి. ప్రస్తుతం రెండు బయోపిక్ లు ఎన్టీఆర్, వైఎస్ఆర్ సెట్స్ మీదున్నాయి. ఈ రెండు కూడా వచ్చే యేడాది సంక్రాంతికి ప్రేక్షకుల ముందుకు రానున్నారు. ఇదిలావుండగా.. తెలంగాణ ఉద్యమ నేత, టీఆర్ ఎస్ అధినేత కేసీఆర్ బయోపిక్ రాబోతున్నట్టు ప్రచారం జరుగుతోంది. కేసీఆర్ పాత్రలో బాలీవుడ్ నటుడు నవాజుద్దీన్‌ సిద్ధిఖీ నటిస్తారని చెప్పుకొంటున్నారు. తాజాగా, ఈ ప్రచారంపై నవాజుద్దీన్‌ సిద్ధిఖీ క్లారిటీ ఇచ్చారు.
నవాజుద్దీన్‌ సిద్ధిఖీ కీలక పాత్రలో నటించిన చిత్రం ‘మంటో’. నందితాదాస్‌ దర్శకత్వం వహిస్తున్నారు. ఈ చిత్రం సెప్టెంబరు 21న ప్రేక్షకుల ముందుకు రానుంది. ఈ నేపథ్యంలో చిత్ర ప్రమోషనలో భాగంగా నవాజుద్దీన్‌ హైదరాబాద్‌లో పర్యటించారు. ఈ సందర్భంగా కేసీఆర్ బయోపిక్‌లో నవాజుద్దీన్‌ నటించనున్నట్లు వచ్చిన వార్తలపై ఆయనను ప్రశ్నించగా.. కేసీఆర్ బయోపిక్‌నకు సంబంధించి తనని ఎవరూ సంప్రదించలేదన్నారు. ఐతే, ఆ అవకాశం వస్తే కేసీఆర్ బయోపిక్‌లో నటించడానికి తనకు ఎలాంటి అభ్యంతరం లేదని పేర్కొన్నారు.
