ఏఎన్నార్’గా సుమంత్ ఫస్ట్ లుక్

క్రిష్ దర్శకత్వంలో ‘ఎన్టీఆర్’ బయోపిక్ తెరకెక్కుతోన్న సంగతి తెలిసిందే. ఇందులో ఎన్టీఆర్‌ పాత్రలో బాలకృష్ణ నటిస్తున్నారు. అక్కినేని నాగేశ్వరరావు పాత్రలో ఆయన మనవడు సుమంత్‌ నటిస్తున్నారు. ఈరోజు ఏఎన్నార్‌ 94వ జయంతిని పురస్కరించుకుని సినిమాలోని ఏఎన్నార్‌ లుక్‌ను సుమంత్‌ ట్విటర్‌ ద్వారా విడుదల చేశారు. ‘ఈ రోజు ఏఎన్నార్‌ 94వ జయంతి. పుట్టినరోజు శుభాకాంక్షలు తాత. సినిమాలో ఇది నా లుక్‌’ అంటూ సుమంత్‌ ట్వీట్‌ చేశారు.

ఏఎన్నార్‌ పాత్రలో సుమంత్ ఒదిగిపోయారు. అదే తలకట్టు, మీసం, కళ్లజోడుతో తాతకు తగ్గ మనవడు అనిపించుకున్నారు. ఈ సినిమా షూటింగ్ కు వెళ్తున్న తొలిరోజు సుమంత్‌ తన తాతగారు వాడిన ఆఖరి కారులోనే సెట్స్‌కు వెళ్లారు. ముందుగా ఎన్టీఆర్ లో ఏఎన్నార్ పాత్ర కోసం నాగ చైతన్య పేరు వినిపించింది. చివరకు ఆ అవకాశం సుమంత్ కు దక్కింది. ఇక, ఈ చిత్రంలో ఎన్టీఆర్‌ అల్లుడు, ఆంధ్రప్రదేశ్‌ ముఖ్యమంత్రి నారా చంద్రబాబు నాయుడు పాత్రలో రానా దగ్గుపాటి నటిస్తున్నారు.

ఈ చిత్రంలో ఎన్టీఆర్‌ సతీమణి బసవతారకం పాత్రలో బాలీవుడ్‌ నటి విద్యాబాలన్‌ నటిస్తున్నారు. శ్రీదేవి పాత్రలో రకుల్ ప్రీత్ సింగ్, మహానటి సావిత్రిగా కీర్తి సురేష్ కనిపించనున్నారు. సూపర్ స్టార్ కృష్ణ పాత్రలో మహేష్ బాబు కనిపిస్తాడని చెబుతున్నారు. తెలుగుతో పాటు తమిళం, హిందీలోనూ తెరకెక్కుతోన్న ‘ఎన్టీఆర్’ని వచ్చే యేడాది సంక్రాంతి కానుకగా ప్రేక్షకుల ముందుకు తీసుకు రానున్నారు.