ఖైరతాబాద్’ని దానం చేశారు

ఖైరతాబాద్ టీఆర్ఎస్ అభ్యర్థిగా దానం నాగేందర్ పేరు ఖరారైనట్టు సమాచారమ్. ఇటీవలే కాంగ్రెస్ నుంచి టీఆర్ఎస్ లో చేరారు దానం. ఆయన జూబ్లీ హీల్స్ స్థానాన్ని ఆశించారు. ఐతే, మళ్లీ సిట్టింగులకే పెద్ద పీఠ వేసిన కేసీఆర్.. ఆ స్థానాన్ని మళ్లీ మాగంటి గోపీనాథ్ కే కేటాయించారు. దాంతో దానం తిరిగి కాంగ్రెస్ వైపు చూస్తున్నాడనే ప్రచారం జరిగింది. ఇంతలో టీఆర్ఎస్ అధిష్టానం నుంచి దానంకు టికెట్ గ్యారెంటీ అనే భరోసా లభించింది. ఆయన్ని గోషామహల్ నుంచి బరిలోకి దింపనున్నారని చెప్పుకొన్నారు.

ఇంతలో ఏం జరిగిందో ఏమో.. దానంకు ఖైరతాబాద్ టికెట్ ని కేటాయిస్తూ టీఆర్ఎస్ అధిష్టానం నిర్ణయం తీసుకొన్నట్టు తెలిసింది. ఆ స్థానాన్ని ఆశిస్తున్న దివంగత పీజేఆర్ కుమార్తె విజయారెడ్డి కంగుతున్నారు. ఆమె హుటాహుటిన కేటీఆర్ ను కలిశారు. ఆయన విజయకు సర్థిచెప్పినట్టు సమాచారమ్. గత ఎన్నికల్లో ఈ స్థానం నుంచి భాజాపా అభ్యర్థి చింతల రామచంద్రారావు గెలుపొందారు. మరోసారి ఆయనే తిరిగి పోటీ చేయనున్నారు. ఈ నేపథ్యంలో ఆయనకు దానం అయితే గట్టిపోటీ ఇవ్వగలరని తెరాస భావిస్తున్నట్టు సమాచారమ్.