‘కొరటాలతో విజయ్ దేవరకొండ సినిమా’ ఎప్పుడంటే ?
టాలీవుడ్ స్టార్స్ ప్రభాస్, మహేష్, ఎన్టీఆర్ లకు బ్లాక్ బస్టర్ హిట్స్ ఇచ్చిన దర్శకుడు కొరటాల శివ. వీరిలో మహేష్ రెండు (శ్రీమంతుడు, భరత్ అను నేను) బ్లాక్ బస్టర్స్ ఇచ్చాడు. ఇక, ప్రభాస్ ‘మిర్చి’, ఎన్టీఆర్ ‘జనతా గ్యారేజ్’ చిత్రాలు ఎంతటి ఘన విజయాన్ని సాధించాయి అన్నది తెలిసిందే. ఇప్పుడీ దర్శకుడు మెగాస్టార్ చిరంజీవితో ఓ సినిమా చేయబోతున్నాడు. ఇప్పటికే కథ రెడీ అయ్యింది. వచ్చే యేడాది సంక్రాంతి తర్వాత ఈ సినిమా ప్రారంభం కానుంది.
ఈ సినిమా తర్వాత కొరటాల శివ యూత్ మెగాస్టార్ విజయ్ దేవరకొండతో ఓ సినిమా చేయబోతున్నాడు. ఇటీవల ‘సవ్యసాచి’ ప్రీ-రిలీజ్ వేడుకలో విజయ్ తో ఓ సినిమా చేయాలనుందని కొరటాల అన్న సంగతి తెలిసిందే. ఇప్పుడా సినిమా ఫిక్సయినట్టు సమాచారమ్. మెగాస్టార్ తో సినిమా తర్వాత విజయ్ దేవరకొండతో కొరటాల సినిమా ఉండనుందని తెలిసింది. ఇదే నిజమైతే విజయ్ ఖాతాలో మరో బ్లాక్ బస్టర్ హిట్ పడినట్టే. ప్రస్తుతం విజయ్ డియర్ కామ్రెడ్’ సినిమాతో బిజీగా ఉన్నారు. ఈ చిత్రానికి భరత్ కమ్మ దర్శకత్వం వహిస్తున్నారు. ఇక, విజయ్ ‘టాక్సీవాలా’ రిలీజ్ కి రెడీ గా ఉంది.
