ఆలేరులో కూలిన ఆర్మీ ట్రైనీ విమానం
యాదాద్రి జిల్లాలోని ఆలేరు మండలం బాహుపేట శివారులో సైనిక శిక్షణ విమానం కూలిపోయింది. హకీంపేటలోని ఎయిర్‌ఫోర్స్‌ స్టేషన్‌నుంచి బయలుదేరిన ట్రైనీ విమానం ఇది. మధ్యాహ్నం 12గం సమయంలో బాహుపేట శివారులోని ఓ వెంచర్‌లో కూలిపోయింది. ప్రమాదాన్ని ముందుగానే గుర్తించిన పైలట్‌ యోగేశ్‌ యాదవ్‌ పారాచ్యూట్‌ సాయంతో కిందికి దూకాడు. అతనికి తీవ్ర గాయాలయ్యాయి. పైలట్‌కు ఆలేరు ఆసుపత్రిలో ప్రథమ చికిత్స అందించి.. హైదరాబాద్‌లోని మిలటరీ ఆస్పత్రికి తరలించారు.
ఈ ప్రమాదంలో విమానం కాలి బూడిదైపోయింది. విషయం తెలిసిన వెంటనే సైనిక అధికారులు హెలికాప్టర్‌లో వైద్య సిబ్బందిని ఘటనాస్థలికి పంపించారు. ఘటనపై విచారణ చేపడుతున్నట్లు సైనికాధికారులు తెలిపారు. గత వారంలో హైదరాబాద్‌ శివారులో ఓ శిక్షణ విమానం కూలిన విషయం తెలిసిందే.
