హైదరాబాద్ అభివృద్ధి టీడీపీ కష్టార్జితం !
హైదరాబాద్ అభివృద్ధి టీడీపీ కష్టార్జితం అన్నారు ఆ పార్టీ అధినేత, ఏపీ ముఖ్యమంత్రి చంద్రబాబు. తెలంగాణ ఎన్నికల ప్రచారంలో భాగంగా గురువారం చంద్రబాబు శేరిలింగంపల్లిలో రోడ్ షో నిర్వహించారు. ఈ సందర్భంగా మాట్లాడిన బాబు.. గతంలో కేసీఆర్ తనపై చేసిన ఆరోపణలపై కౌంటర్ ఇచ్చారు. హైదరాబాద్ ని చంద్రబాబే కట్టినట్టు చెప్పుకొంటున్నాడని కేసీఆర్ విమర్శిస్తున్నారు. అది తప్పుడు ప్రచారం. తానెప్పుడు అలా ప్రచారం చేసుకోలేదు. సైబరాబాద్ ను మాత్రమే నిర్మించా.
హైదరాబాద్’కు పేరు తీసుకొచ్చా. తెలంగాణలో ఎవరూ ఊహించని అభివృద్ధిని టీడీపీ ప్రభుత్వం చేపట్టింది. హైదరాబాద్ అభివృద్ధి టీడీపీ కష్టార్జితం. టీడీపీ ప్రభుత్వం చొరవతోనే నేడు హైదరాబాద్ లో లక్షలాది మందికి ఐటీ ఉద్యోగాలు వచ్చాయి. హైదరాబాద్ లో ఉన్న స్టేడియాలు, ఔటర్‌ రింగ్‌ రోడ్డు, ఎయిర్‌పోర్టు టీడీపీ హయాంలో నిర్మించినవేనని తెలిపారు. హైదరాబాద్ కు కృష్ణా జలాలను తీసుకొచ్చిన ఘనత తమదేనని అన్నారు చంద్రబాబు.
