పోలవరం కాంక్రీట్‌ పనుల్లో గిన్నిస్‌ రికార్డు

పోలవరం ప్రాజెక్టు కొత్త చరిత్ర లిఖించింది. కాంక్రీట్ పనుల వేగంలో కొత్త రికార్డు సృష్టించి గిన్నిస్ బుక్ లోకి ఎక్కింది. గతంలో దుబాయ్ సంస్థ 24 గంటల వ్యవధిలో 21, 580 క్యూబిక్ మీటర్ల కాంక్రీట్ పనులు పూర్తి చేసి సృష్టించిన రికార్డును పోలవరం బద్దలు కొట్టింది. 24 గంటల్లో 32వేల క్యూబిక్‌ మీటర్ల కాంక్రీటు పనులు పూర్తి చేశారు. దీంతో.. ప్రాజెక్టు కాంట్రాక్ట్ సంస్థ నవయుగ ఇంజినీరింగ్ కాంక్రీట్ పై ప్రశంసలు కురుస్తున్నాయి.

ఈ రికార్డుపై ఏపీ సీఎం చంద్రబాబు హర్షం వ్యక్తం చేశారు. నవయుగ సంస్థ ఎండీ శ్రీధర్‌, ఇంజనీర్లు, జలవనరుల శాఖ అధికారులను సీఎం అభినందించారు. మరోవైపు, గిన్నిస్‌ రికార్డు సాధించడంతో పోలవరంలో సంబురాలు చేసుకుంటున్నారు. అధికారులు, ఇంజనీర్లు మిఠాయిలు తినిపించుకున్నారు. మధ్యాహ్నం 2.30 గంటలకు సీఎం చంద్రబాబు పోలవరం చేరుకోనున్నారు. గిన్నిస్‌ బుక్‌ ప్రతినిధుల చేతుల మీదుగా అధికారికంగా రికార్డు పత్రాలను అందుకోనున్నారు.