‘చిత్రలహరి’ చిత్రబృందం సక్సెస్ మీట్
వరుసగా ఆరు సినిమాలతో పరాజయాన్ని చవిచూశాడు సాయిధరమ్‌ తేజ్‌. ఒక మంచి విజయం కోసం ఎదురు చూస్తున్న ఆయన… ఆ విజయం నేపథ్యంలో సాగే కథనే ఎంచుకుని ‘చిత్రలహరి’ చేశాడు. శుక్రవారం ప్రేక్షకుల ముందుకొచ్చిన చిత్రలహరి మంచి టాక్ తెచ్చుకొంది. ఈ నేపథ్యంలో చిత్రబృందం విజయోత్సవ సభని నిర్వహించింది.
ఈ సందర్భంగా తేజు మాట్లాడుతూ.. “హిట్‌ కోసం వెయిట్‌ చేస్తున్న నాకు ఈ సినిమా ఊరటనిచ్చింది. చాలా రోజుల తర్వాత విజయోత్సవ వేడుకలో పాల్గొనడం చాలా హ్యాపీగా ఉంది. ఈ విజయం టీమ్‌ అందరిది. మేమంతా కలిసి నిజాయితీగా చేసిన ప్రయత్నమిది. పక్కింటి కుర్రాడి తరహాలో ఉండే నా పాత్రకి ప్రేక్షకులు బాగా కనెక్ట్‌ అవుతున్నారు. ఈ సక్సెస్‌కి కారణమైన దర్శకుడు కిషోర్‌ తిరుమలకి చిత్రబృందానికి థ్యాంక్స్” అన్నారు
దర్శకుడు మాట్లాడుతూ.. “ఏ విజయం కోసమైతే టీమ్‌ అంతా కష్టపడ్డామో ఆ సక్సెస్‌ని ఆడియెన్స్‌ అందించారు. సినిమాలోని ప్రతి సన్నివేశాన్ని ఆస్వాదిస్తున్నారు. చాలా మంది యూత్‌ ఇది తమ కథలా ఉందని చెబుతుండటం మరింత హ్యాపీగా ఉంది’ అన్నారు.
