టైగ‌ర్ కు ముహూర్తం ఫిక్స్

ఓ హిట్ కోసం హీరో బెల్లకొండ శ్రీనివాస్ ప్రయత్నాలు కొనసాగుతూనే ఉన్నాయి. వరుసపెట్టి సినిమాలు చేస్తున్నారు. ‘కవచం’ వచ్చిన కొన్నాళ్లకి ‘సీత’ ప్రేక్షకుల ముందుకొచ్చింది. సీతలో తనశైలికి భిన్నంగా కనిపించారు శ్రీనివాస్. అయినా.. హిట్ దక్కలేదు. ప్రస్తుతం శ్రీనివాస్ ‘రాక్షసుడు’ సినిమాతో బిజీగా ఉన్నారు. ఇటీవలే విడుదలైన రాక్షసుడు టీజర్ కి మంచి స్పందన వచ్చింది.

రాక్షసుడు తర్వాత బెల్లకొండ గజదొంగగా మారనున్నాడు. ‘టైగ‌ర్ నాగేశ్వ‌ర రావు’గా కనిపించనున్నాడు. 1980-90 దశకాల్లో స్టూవర్టుపురం గజదొంగగా అంద‌రిని వ‌ణికించిన టైగ‌ర్ నాగేశ్వ‌ర్‌రావు జీవితకథగా తెరకెక్కనున్న చిత్రమిది. ఈ చిత్రానికి దొంగాట, కిట్టు ఉన్నాడు జాగ్రత్త’ చిత్రాల దర్శకుడు వంశీకృష్ణ దర్శకత్వం వహించనున్నారు. బెల్లకొండకి జంటగా పాయల్ రాజ్ పుత్ జతకట్టనుంది. ఈ సినిమా కోసం ముందుగా నాని హీరో అనుకొన్నా.. ఫైనల్ గా బెల్లకొండ ఫిక్సయ్యాడు. ఆగస్టు నుంచి ఈ సినిమా రెగ్యూలర్ షూటింగ్ ప్రారంభం కానుంది.