డబ్బులు తీసుకోకుండానే.. 14 సినిమాలు చేశా !
మంచి నటుడు అనిపించుకున్నాడు సందీప్ కిషన్. ‘వెంకటాద్రి ఎక్స్‌ప్రెస్‌’తో హిట్ కొట్టాడు. ఆ తర్వాత ఆయన ఖాతాలో మరో హిట్ పడలేదు. వరుసగా ప్లాపులు పలకరిస్తుండటంతో రెండేళ్లుగా సినిమాలకి దూరంగా ఉన్నాడు. ఆ బాధ నుంచి బయటపడటానికి విదేశాలకి వెళ్లాడు. తిరిగొచ్చాక నిర్మాతగా మారి ‘నిన్ను వీడని నీడను నేనే’ సినిమా చేశాడు. ఈ శుక్రవారం (జులై12) ప్రేక్షకుల ముందుకు రానుంది.
ఈ నేపథ్యంలో సినిమా ప్రమోషన్స్ లో పాల్గొన్న సందీప్ కిషన్ ఆసక్తికర విషయాలు పంచుకొన్నారు. “తమిళంలో నాకు మంచి సినిమాలు పడ్డాయి. ఒప్పుకోవాలే గానీ, నాలుగైదు తమిళ చిత్రాలు రెడీగా ఉన్నాయి. హిందీలోనూ హిట్టు కొట్టాను. అమేజాన్‌లో ఓ వెబ్‌ సిరీస్‌ కూడా చేశాను. తెలుగులోనే సరైన సినిమా రాలేదు. అందుకే ఇప్పుడు ‘ఇంట గెలిచి తీరాలి’ అనుకుని ఈ సినిమా చేశాన”నన్నారు. అంతేకాదు.. ఇప్పటి వరకు డబ్బులు తీసుకోకుండా 14 సినిమాల్లో నటించాడట. సినిమా హిట్ అయితే డబ్బులిస్తామనేవారు.. హిట్టైన సగం మంది డబ్బులు ఎగొట్టారని చెప్పుకొచ్చారు సందీప్.
