అలర్ట్ : టాటూ వేసుకొంటే.. ఆర్మీ ఉద్యోగానికి అనర్హులు

ఆర్మీలో చేరి దేశానికి సేవ చేయాలనే కోరిక కలిగిన యువతకు శుభవార్త. భారత సైన్యంలో విస్తృతంగా ఉన్న అవకాశాలను తెలియజేయడానికి తెలంగాణ అకాడమీ ఫర్ స్కిల్ ఆండ్ నాలెడ్జ్ (టాస్క్) అవగాహన కార్యక్రమాలను నిర్వహించనున్నారు. ఈ శిక్షణ వచ్చే నెల(ఆగస్టు)లో వరంగల్, రామగుండం నగరాల్లో ప్రారంభించనున్నారు. ఈ మేరకు టాస్క్ సీఈవో శ్రీకాంత్‌సిన్హా ఓ ప్రకటనలో తెలిపారు. దీంతో పాటు యువతకి ఓ విలువైన సూచన కూడా చేశారు.

టాటూ (పచ్చబొట్టు) కలిగి ఉంటే ఆర్మీ ఉద్యోగానికి అనర్హులుగా ప్రకటిస్తారు. ఇలాంటి విషయాలపై అవగాహన లేకపోవడం కారణంగా చాలామంది అవకాశాలు కోల్పోతున్నారని చెప్పారు. ఆర్మీలో ఉద్యోగానికి సంబంధించిన శారీరక, మానసిక, విద్యా సంబంధమైన అర్హతల గురించి టాస్క్ శిక్షణ ఇవ్వనుంది. ఈ అవకాశాన్ని సద్వినియోగం చేసుకోవాలని శ్రీకాంత్‌సిన్హా తెలిపారు.