‘బందోబస్త్’కు సూపర్ స్టార్స్ !
బందోబస్త్ కు చీఫ్ గెస్టులుగా సూపర్ స్టార్స్ విచ్చేశారు. తమిళ్ స్టార్ సూర్య తాజా చిత్రం ‘కాప్పాన్‌’. కేవీ ఆనంద్‌ దర్శకుడు. తెలుగులో ‘బందోబస్త్’గా వస్తోంది. మోహన్‌లాల్‌ ముఖ్యపాత్ర పోషించారు . సోమవారం ఈ సినిమా ఆడియో, ట్రైలర్‌ విడుదల కార్యక్రమం చెన్నైలో జరిగింది. ఈ వేడుకకి సూపర్ స్టార్ రజనీకాంత్ ముఖ్య అతిథిగా హాజరయ్యారు.
ఈ సందర్భంగా రజనీకాంత్ మాట్లాడుతూ “సూర్య పట్టుదలతో ఈ స్థాయికి ఎదిగారు. ‘నేరుక్కునేర్‌’ సినిమాలో ఆయన్ని చూసినప్పుడు ఇతను రాణించగలడా..?అని అనుకున్నా. ఆ తర్వాత ‘నందా’, ‘పితామగన్‌’ చిత్రాల్లో మెరుపులు మెరిపించారు. ఇప్పుడు ఉన్నతమైన నటుడిగా ఎదిగారు. తనను తానే తీర్చిదిద్దుకొని ఈ స్థాయికి చేరుకున్నారు. సూర్య, కార్తిలను శివకుమార్‌ ఉన్నతంగా తీర్చిదిద్దారు. ఇళయరాజా, ఏఆర్‌ రెహమాన్‌ల కలబోత హారీస్‌ జయరాజ్‌. ఆయన సంగీతంలోని ‘వశీగరా..’ పాటకు నేను పెద్ద అభిమానిని”అన్నారు.
మోహన్ లాల్ మాట్లాడుతూ.. “సూర్యలాగా చిత్ర పరిశ్రమపై అంకితభావమున్న నటుడిని నా 40 ఏళ్ల సినీ జీవితంలో చూడలేదు. ఈ చిత్రంలో నా కుమారుడిగా ఆర్య నటించారు. షూటింగ్‌ కారణంగా ఈమధ్య జరిగిన ఆయన పెళ్లికి నేను హాజరు కాలేకపోయాను’’ అన్నారు.
