సరిలేరు ప్రీ రిలీజ్ ఫంక్షన్ అల.. ప్లాన్ చేశారు !

సూపర్ స్టార్ మహేష్ బాబు తాజా చిత్రం ‘సరిలేరు నీకెవ్వరు’. అనిల్ రావిపూడి దర్శకుడు. రష్మికమందన హీరోయిన్. లేడీ సూపర్ స్టార్ విజయశాంతి కీలక పాత్రలో నటిస్తున్నారు. దేవిశ్రీ ప్రసాద్ సంగీతం అందిస్తున్నారు. వచ్చే యేడాది సంక్రాంతి కానుకగా జనవరి 11న సరిలేరు ప్రేక్షకుల ముందుకు రానుంది. ఈ సినిమా మరో సంక్రాంతి సినిమా అల్లు అర్జున్ ‘అల.. వైకుంఠపురంలో’తో పోలిస్తే.. ప్రమోషన్స్ లో వెనకబడిందనే ప్రచారం జరిగింది. ఆ ప్రచారానికి సరిలేరు టీజర్ తో సమాధానం చెప్పింది.

సరిలేరు టీజర్ నాలుగైదు రోజులు ట్రెడింగ్ టాప్ లో కొనసాగింది. ఆ ప్రమోషన్ హీట్ ని కొనసాగిస్తూ మహేష్ మండే స్పెషల్ పేరిట.. డిసెంబర్ లో ప్రతి సోమవారం ఓ పాట చొప్పున ఐదు పాటలని విడుదల చేయబోతుంది చిత్రబృందం. అంతేకాదు.. సరిలేరు ప్రీ రిలీజ్ ఫంక్షన్ ని భారీ స్థాయిలో నిర్వహించేందుకు ప్లాన్ చేస్తున్నారు. జ‌న‌వ‌రి 5వ తేదీన భారీ ఎత్తున ఈ సినిమా ప్రీ రిలీజ్ ఈవెంట్ నిర్వహించాలని ప్లాన్ చేస్తున్నారని తెలిసింది. మునుపెన్నడూ ఏ సినిమాకు లేని విధంగా అట్టహాసంగా ఈ ఈవెంట్ నిర్వహించాలని మహేష్ బాబు చెప్పారని సమాచారమ్. ముఖ్య అతిధిగా కూడా ఓ స్టార్ హీరోను ఆహ్వానించాలని చూస్తున్నారట.

అదెవ్వరు ? అనేది ప్రస్తుతానికి సస్పెన్స్. ‘భరత్ అనే నేను’ ప్రీ రిలీజ్ ఈవెంట్ కు యంగ్ టైగర్ ఎన్ టీఆర్ ముఖ్య అతిథిగా విచ్చేశారు. మళ్లీ ఆయన్నే ఆహ్వానిస్తారా ? లేదంటే.. మెగాస్టార్ చిరంజీవిని తీసుకొస్తారా ? అనేది తెలియాల్సి ఉంది. మొత్తానికి.. సరిలేరు ప్రీ రిలీజ్ ఫంక్షన్ గురించి ఇప్పటి నుంచే మాట్లాడుకొనేలా లీకులు వదులుతుంది చిత్రబృందం.