తెలంగాణ కొత్త సీఎస్ ఎవరు ?
తెలంగాణ కొత్త సీఎస్ గా ఎవరు నియమితులు కాబోతున్నారన్నది ఆసక్తిగా మారింది. సీస్ గా బాధ్యతలు స్వీకరిస్తున్న ఎస్‌కే జోషి రేపు (డిసెంబర్ 31) పదవి విరమణ చేయనున్నారు. ఈ నేపథ్యంలో ఆయన స్థానంలో కొత్త సీస్ ని ఇవాళ ప్రకటించనున్నారు. సీఎం కేసీఆర్ మధ్యమానేరు పర్యటన అనంతరం కరీంనగర్‌ నుంచి సోమవారం రాత్రి హైదరాబాద్‌కు చేరుకున్నాక.. సీఎస్‌ను ఎంపిక చేయనున్నట్లు తెలుస్తోంది.
కొత్త సీఎస్ పదవికి ప్రత్యేక ప్రధాన కార్యదర్శులు అజయ్‌ మిశ్రా, సోమేశ్‌కుమార్‌, రామచంద్రారావు పేర్లు పరిశీలనలో ఉన్నాయి. సీనియారిటీ జాబితాలో మొదటి స్థానంలో ఉండడం అజయ్‌మిశ్రాకు అనుకూలంగా ఉంది. అయితే వచ్చే జులై వరకే ఆయన పదవీకాలం ఉంది. 2023 డిసెంబరు వరకు సర్వీసు ఉండటం సోమేశ్‌కుమార్‌కు సానుకూలంగా మారింది. ఈ పదవిలో నియమిస్తే ఆయన వచ్చే శాసనసభ ఎన్నికలు ముగిసే వరకు సీఎస్‌గా కొనసాగే వీలుంది. అజయ్‌మిశ్రాకు అవకాశం ఇచ్చి ఆ తర్వాత సోమేశ్‌కుమార్‌ను కొనసాగించడం, లేదా సోమేశ్‌కే నేరుగా అవకాశం ఇవ్వడమనే రెండు ప్రతిపాదనలను ముఖ్యమంత్రి పరిశీలిస్తున్నట్లు తెలుస్తోంది.
