‘తాప్పడ్’ ట్రైలర్ టాక్
సొట్టబుగ్గుల సుందరి తాప్సీ బాలీవుడ్ లో బాగా రాణిస్తున్న సంగతి తెలిసిందే. వైవిధ్యమైన సినిమాలని చేస్తే మంచి నటి అనిపించుకుంటోంది. ఆమె తాజా బాలీవుడ్ చిత్రం ‘తాప్పడ్’. అనుభవ్‌ సుశీల సిన్హా దర్శకత్వం వహిస్తున్నారు. ఫిబ్రవరి 28న తాప్పడ్ ప్రేక్షకుల ముందుకు రానుంది. ఈ సినిమా ఫస్ట్‌లుక్‌ పోస్టర్‌ను గురువారం విడుదల చేశారు. తాజాగా ట్రైలర్ ని వదిలారు.
ఓ పార్టీలో అందరి ముందూ భర్త తనని కొట్టారని తాప్సీ విడాకులకు దరఖాస్తు చేయడం ట్రైలర్ లో చూడొచ్చు. తాను విడాకులు తీసుకోడానికి గల కారణం గురించి తాప్సీ తన లాయర్ కు చెబుతూ కనిపించారు. మిమ్మల్ని తిరిగి ఇంటికి తీసుకెళ్లడానికి మీ భర్త నుంచి కోర్టు నోటీసులు వచ్చాయి అని లాయర్ చెప్పగానే.. నేను వెళ్లను అని తాప్సీ సమాధానమిస్తారు. మీ భర్తకు ఏదైనా అఫైర్ ఉందా? అని లాయర్ అడగ్గా.. నో అని తాప్సీ చెబుతారు.
దీంతో లాయర్ వెంటనే మరి మీకు ఏదైనా అఫైర్ ఉందా? అని ప్రశ్నిస్తుంది. దానికి కూడా తాప్సీ నో అనే సమాధానం చెబుతారు. కేవలం పార్టీలో చెంపదెబ్బ కొట్టారనే మీరు.. మీ భర్త నుంచి విడాకులు తీసుకోవాలనుకొంటున్నారా అని లాయర్ ఆశ్చర్యంగా ప్రశ్నించగా.. అది కేవలం చెంప దెబ్బ మాత్రమే కాదు..అని తాప్సీ చెప్పడంట్రైలర్ లో చూడొచ్చు. ఇందులో గృహిణిగా తాప్సీ ఆత్మ గౌరవాన్ని చూడబోతున్నట్టు అర్థమవుతోంది.
