నళినీ ఆంటీని మిస్సయిన మహేష్
సూపర్ స్టార్ మహేష్ బాబు నళినీ ఆంటీని మిస్సయ్యాడు. ఈ నళినీ ఆంటీ ఎవరు అనుకుంటున్నారా ? రాఘవేంద్రరావు దర్శకత్వంలో వచ్చిన ‘రాజకుమారుడు’తో మహేష్ హీరోగా ఎంట్రీ ఇచ్చిన సంగతి తెలిసిందే. ఆ తర్వాత స్టార్ హీరోగా ఎదిగాడు. ఇప్పుడు టాలీవుడ్ ని ఏలుతున్నాడు. అయితే రాజకుమారుడు కంటే ముందు మహేష్ కోసం ఒకట్రెండు సినిమాలు అనుకొన్నారు.
వీటిలో ‘నళినీ ఆంటీ..నీకు ఫోనొచ్చింది’ ఒకటి. ఈ కథని దర్శకుడు వంశీ మహేష్ కోసం రాసుకున్నారు. సూపర్ స్టార్ కృష్ణకి వినిపించారు. ఆయనకి నచ్చింది. కానీ, మహేష్ చదువు పూర్తయ్యేవరకు హీరోగా ఎంట్రీ వద్దనుకున్నారు. ఆ తర్వాత ఎస్వీ కృష్ణారెడ్డి మహేష్ కోసం ‘యమలీల’కథని వినిపించారు. ఈ కథ కృష్ణకి బాగా నచ్చింది. కానీ, మహేష్ ని హీరోగా ఎంట్రీ ఇప్పించే సందర్భం ఇది కాదని సున్నితంగా తిరస్కరించారు. ఆ తర్వాత యమలీల అలీ హీరోగా తెరకెక్కి.. రికార్డులు సృష్టించింది.
