పోలీసుల గొప్పదనంపై దిల్ రాజు సినిమా
కరోనా విజృంభిస్తున్న కఠిన సమయాన విధులు నిర్వహిస్తున్న పోలీసులపై పలువురు ప్రశంసలు కురిపిస్తున్న సంగతి తెలిసిందే. మెగాస్టార్ చిరంజీవి, సూపర్ స్టార్ మహేష్ బాబు, నాగ చైతన్య తదితరులు ట్విట్టర్ వేదికగా పోలీసులకి సెల్యూట్ చేశారు. తాజాగా నిర్మాత దిల్ రాజు పోలీసుల గొప్పదనాన్ని వివరిస్తూ ఓ సినిమా చేయబోతున్నట్టు ప్రకటించారు. స్క్రిప్ట్ కూడా రెడీ అయిందన్నారు.
దిల్ రాజు శుక్రవారం మెహిదీపట్నంలో పోలీసు సిబ్బందికి సానిటైజర్లు, మాస్కులను పంపిణీ చేశారు. ఈ సందర్భంగా మాట్లాడిన దిల్ రాజు.. ‘పోలీసుల గొప్పతనాన్ని వివరిస్తూ ఓ సినిమా తీయాలని చాలారోజుల నుంచి అనుకుంటున్నట్లు చెప్పారు. కరోనా నేపథ్యంలో ఈ ఆతృత మరింత పెరిగిందని, కథ కూడా సిద్ధమైంది’ అని తెలిపాడు. లాక్ డౌన్ నేపథ్యంలో ఇళ్లలోనే ఉండాలని, అత్యవసర పరిస్థితుల్లో బయటికి వస్తే, సామాజిక దూరం పాటించాలని విజ్ఞప్తి చేశారు.
