సినిమాటోగ్రాఫర్‌ కన్నన్ కన్నుమూత
2020లో అన్నీ విషాద వార్తలే. ఓ వైపు కరోనా, మరోవైపు ప్రముఖుల మృతి చెందుతున్నారు. తాజాగా ప్రముఖ సినిమాటోగ్రాఫర్‌ బి. కన్నన్ (69) కన్నుమూశారు. గత కొన్ని రోజులుగా హృదయ సంబంధిత సమస్యతో బాధపడుతున్న ఆయన చెన్నైలోని ఓ ప్రైవేటు ఆసుపత్రిలో శనివారం మధ్యాహ్నం తుదిశ్వాస విడిచారు. కన్నన్ మృతిపట్ల పలువురు సినీ ప్రముఖులు దిగ్భ్రాంతి వ్యక్తం చేశారు.
కన్నన్ తమిళంతోపాటు తెలుగు, మలయాళ చిత్రాలకు కూడా సినిమాటోగ్రఫీ అందించారు. లెజెండరీ తమిళ దర్శకుడు భారతీరాజాతో కలిసి దాదాపు 40 సినిమాల కోసం పనిచేశారు. అందుకే ఆయన్ను ‘భారతీరాజా కంగల్‌’ (భారతీరాజా కళ్లు) అని పిలుస్తుంటారు. కన్నన్ తెలుగులో ‘పగడాల పడవ’, ‘కొత్త జీవితాలు’, ‘సీతాకోక చిలుక’, ‘ఆరాధన’ సినిమాలకు సినిమాటోగ్రఫీ అందించారు.
