ధోని.. అతిపెద్ద సూపర్ స్టార్ !

మహేంద్రసింగ్‌ ధోనీ క్రికెట్‌లో అతిపెద్ద సూపర్‌స్టార్‌ అని వెస్టిండీస్‌ ఆల్‌రౌండర్‌ డ్వేన్‌ బ్రావో అన్నాడు. తాజాగా బ్రావో జింబాబ్వే పేసర్‌ పామీ బంగ్వాతో ఇన్‌స్టాగ్రామ్‌ లైవ్‌చాట్‌లో ముచ్చటించారు. ఈ సందర్భంగా ధోని గురించి మాట్లాడారు.

‘ఎంఎస్‌ ధోనీ క్రికెట్‌లోనే కాకుండా మా జట్టులోనూ అతిపెద్ద సూపర్‌స్టార్‌. అందరితో కలివిడిగా ఉండేవాళ్లలో అతనొకడు. అతడితో చాలా తేలికగా సంభాషించొచ్చు. అతడు మైదానం బయట కూడా అంతే సహజంగా ఉంటాడు. వీడియోగేమ్స్‌ కూడా ఆడే వ్యక్తి. ఎప్పుడైనా అతడితో మాట్లాడటానికి అవకాశం ఉంటుంది. మీరు ఎప్పుడైనా పెద్ద సూపర్ స్టార్ల గురించి మాట్లాడుతుంటే.. వాళ్లందరిలో ధోనీ అత్యంత వినయపూర్వకమైన వ్యక్తిగా గుర్తుకువస్తాడు’ అని చెప్పుకొచ్చాడు.

ధోనీ సారథ్యంలోని చెన్నై ఐపీఎల్‌లో విజయవంతమైన జట్టుగా కొనసాగుతోంది. 2010, 2011, 2018 సీజన్లలో విజేతగా నిలిచి, ముంబయి తర్వాత అత్యధికసార్లు టైటిల్‌ సాధించిన జట్టుగా గుర్తింపు పొందింది. ఇక బ్రావో 2011 నుంచీ చెన్నై తరఫునే ఆడుతున్నాడు. ఇప్పటివరకు సీఎస్కే తరఫున 104 మ్యాచ్‌లు ఆడగా 121 వికెట్లు తీశాడు. అలాగే 2013, 2015 సీజన్లలో అత్యధిక వికెట్లు తీసిన బౌలర్‌గా పర్పుల్‌ క్యాప్‌ అందుకున్నాడు.