ఒక్కరోజులోనే 21వేల కొత్త కేసులు

దేశంలో కరోనా విశ్వరూపం దాల్చుతోంది. రోజూవారీగా నమోదవుతున్న కొత్త కేసుల సంఖ్య భారీగా పెరుగుతోంది. గడిచిన 24గంటల్లో దేశవ్యాప్తంగా కొత్తగా 20,903 పాజిటివ్ కేసులు నమోదయ్యాయి. దేశంలో కరోనా వైరస్ బయటపడిన అనంతరం ఒక్కరోజులోనే ఈ స్థాయిలో నమోదుకావడం ఇదే తొలిసారి. దీంతో దేశంలో కరోనా  బాధితుల సంఖ్య 6,25,544కు చేరింది.

అంతేకాకుండా నిన్న ఒక్కరోజే 379మంది మృతిచెందారు.దేశంలో కరోనా వల్ల మరణించిన వారిసంఖ్య 18,213కు చేరింది. మొత్తం బాధితుల్లో ఇప్పటివరకు 3,79,893మంది కోలుకోగా, మరో 2,27,439మంది కరోనా బాధితులు ఆసుపత్రుల్లో చికిత్స పొందుతున్నారు. గురువారం ఒక్కరోజే 20వేల మంది కరోనా నుంచి కోలుకొని డిశ్చార్జి కావడం విశేషం.