‘సర్కారి వారి పాట’ పాయింట్ ఇదే !
పరశురామ్ దర్శకత్వంలో సూపర్ స్టార్ మహేష్ బాబు నటించనున్న చిత్రం ‘సర్కారు వారి పాట’. కీర్తి సురేష్ హీరోయిన్. మరో హీరోయిన్ గా నివేధా థామస్ ని తీసుకున్నారనే ప్రచారం జరుగుతోంది. దీనిపై చిత్రబృందం క్లారిటీ ఇవ్వాల్సి ఉంది. బలమైన ఎమోషన్స్ తో కూడిన ఫ్యామిలీ ఎంటర్ టైనర్ గా సర్కారు వారి పాట ఉంటుందని గతంలో ఓ ఇంటర్వ్యూలో మహేష్ చెప్పారు.
తాజాగా ఈ సినిమా స్టోరీ పాయింట్ లీకైంది. ఇటీవలి కాలంలో మన దేశంలో బ్యాంకు స్కాములు ఎన్నో చోటుచేసుకున్నాయి. వందలు.. వేల కోట్లకు జాతీయ బ్యాంకులను మోసం చేసి దర్జాగా ఫారిన్ దేశాలకు చెక్కేసిన ఘనులు కూడా వున్నారు. ఇక చిన్నా చితకా బ్యాంకు స్కాములకు అయితే లెక్కేలేదు. ప్రతి రోజూ అలాంటి వార్త ఏదో ఒకటి మనం పేపర్లలో చూస్తూనే వుంటాం. ఇదే ఇతివృత్తంతో సర్కారు వారి పాట తెరకెక్కనుంది. దీనికి ఫ్యామిలీ అంశాలని దట్టించాడు దర్శకుడు అని చెప్పుకొంటున్నారు.
ఇక ఈ సినిమా కథ ప్రకారం ఓ షెడ్యూల్ ని అమెరికాలో చిత్రీకరించాల్సి ఉంటుందట. నెలరోజుల పాటు షెడ్యూల్ అది. కరోనా ప్రభావం తగ్గాక ఆ షెడ్యూల్ ని ప్లాన్ చేయాలని చిత్రబృందం భావిస్తోంది. ఆ లోపు మిగితా పార్ట్ అంతా షూట్ చేయాలనే ప్లాన్ లో ఉన్నారు. త్వరలోనే సెట్స్ మీదకు వెళ్లేందుకు ఏర్పాట్లు చేసుకుంటున్నట్టు సమాచారమ్. ఈ యేడాది సరిలేరు నీకెవ్వరు సినిమాతో బ్లాక్ బస్టర్ హిట్ అందుకున్నారు మహేష్. ఈ ఊపులో సర్కారు వారి పాట కోసం రెడీ అవుతున్న సమయంలో కరోనా వచ్చిపడింది.
