పిక్ ఆఫ్ ది డే : వానరాలకు ఆహారం అందించిన సీఎం కేసీఆర్

సీఎం కేసీఆర్ ఆదివారం యాదాద్రిలో పర్యటించారు. యాదాద్రి చేరుకున్న సీఎం కేసీఆర్ మొదట స్వామి వారిని దర్శించుకున్నారు. ప్రత్యేక పూజలు చేశారు. అనంతరం యాదాద్రి కొండపై కలియ తిరిగి ఆలయ నిర్మాణ పనులని పరిశీలించారు. అధికారులకి సలహాలు సూచనలు చేశారు. గర్భగుడి మెట్ల సంఖ్యపై అసంతృప్తి వ్యక్తం చేసినట్లు తెలుస్తోంది. ఈ విషయంలో కొన్ని సూచనలు చేసినట్టు తెలిసింది.

ఇక కేసీఆర్‌ యాదాద్రి ఆలయ పర్యటనలో ఆసక్తికర సన్నివేశం చోటుచేసుకుంది. కరోనా పరిస్థితులతో భక్తుల రాక తగ్గి ఆకలితో అలమటిస్తున్న వానరాలకు సీఎం ఆహారం అందించారు. కొండపై ఆలయ పునర్నిర్మాణ పనులను పరిశీలించి తిరిగి వెళ్తుండగా యాదాద్రి ఘాట్‌రోడ్డులోని రెండో మలుపు వద్ద కోతుల గుంపును కేసీఆర్‌ చూశారు. దీంతో వాహనాన్ని ఆపి కిందికి దిగారు. కోతులకు సీఎం స్వయంగా అరటిపండ్లు అందించి వాటి ఆకలితీర్చారు. దానికి సంబంధించిన ఫోటోలు, వీడియోలు సోషల్ మీడియాలో వైరల్ అవుతున్నాయి.