తెలంగాణలో 1,708 కొత్త కేసులు, 2,009 మంది రికవరీ !

కరోనా నుంచి తెలంగాణ క్రమంగా కోలుకుంటోంది. కొత్త కేసుల సంఖ్యలో పెద్దగా తగ్గుదల లేకున్నా.. కోలుకుంటున్నవారు సంఖ్య మాత్రం పెరుగుతోంది. గడిచిన 24 గంటల్లో తెలంగాణలో 1,708 కొత్త కేసులు నమోదయ్యాయ్. అదే సమయంలో 2,009 మంది కరోనా నుంచి పూర్తిగా కోలుకొని డిశ్చార్జ్ అయ్యారు. దీంతో ఇప్పటివరకు కోలుకున్న బాధితుల సంఖ్య 1,89,351కి చేరింది.

నిన్న ఒక్కరోజే కరోనాతో ఐదుగురు మృతి చెందారు. దీంతో మృతుల సంఖ్య 1.233కి చేరింది. రాష్ట్రంలో ప్రస్తుతం 24,208 యాక్టివ్‌ కేసులు ఉన్నాయని, వారిలో 19,748 మంది హోం ఐసోలేషన్‌లో చికిత్స పొందుతున్నారని వైద్య ఆరోగ్యశాఖ తెలిపింది. ఇక దేశంలోనూ కరోనా రికవరీ రేటు పెరుగుతోంది. నిన్న ఒక్కరోజే దేశంలో 77,760 మంది కొవిడ్‌ నుంచి కోలుకున్నారు. దీంతో రికవరీ రేటు 86.78శాతానికి పెరిగింది. యాక్టివ్‌ కేసులు సంఖ్య 8,38,729కి పడిపోయాయి. దీంతో ఇప్పటివరకు నమోదైన మొత్తం కేసుల్లో క్రియాశీల కేసులు 11.69శాతానికి తగ్గాయి.