ఎన్టీఆర్’పై ఐదుగురి కుట్ర.. ఇదిగో సాక్ష్యం !
మహా’నటుడు, నేత’ ఎన్టీఆర్ వర్థింతి నేడు. ఈ సందర్భంగా అభిమానులు, తెదేపా శ్రేణులు ఎన్టీఆర్ కు నివాళులు అర్పిస్తున్నారు. ఈ క్రమంలో తెదేపా సీనియర్ నేత అశోక్ గజపతి రాజు కూడా ఎన్టీఆర్ కు ట్విట్టర్ వేదికగా నివాళులు అర్పించారు. అయితే ఆయనపై మాన్సాస్‌ ట్రస్ట్‌ చైర్ పర్సన్‌ సంచయిత తీవ్రంగా మండిపడ్డారు. సంచలన ఆరోపణలు చేశారు.
“పార్టీపెట్టుకుని సొంతకాళ్లమీద అధికారంలోకి వచ్చిన ఎన్టీఆర్‌ను పదవినుంచి తప్పించి ఆయన మరణానికి కారకులైన వ్యక్తుల్లో చంద్రబాబు గారితో పాటు అశోక్ గజపతి రాజు గారు ఒకరు. వీరిని పార్టీని నుంచి బహిష్కరించాలని ఎన్టీఆర్ ఆరోజు రాసిన లేఖ ఇది. ఆనాటి కుట్రలో ఎవరు ఉన్నారో చెప్పే సాక్ష్యం ఇది. రాజకీయ సూత్రాలను, నైతిక విలువలను, ప్రజలిచ్చిన తీర్పును మంటగలిపిన అశోక్ గజపతి రాజు గారు ఎన్టీఆర్ ఆరాధ్యదైవం అంటూ ఆయన వర్థంతి రోజున కొనియాడ్డం, ఒక వ్యక్తిని హత్యచేసిన హంతకుడు, అదే వ్యక్తి దూరమయ్యాడంటూ కన్నీరు కార్చినట్టుగా ఉంది” అని పేర్కొన్నారు.
ఇక సంచయిత షేర్ చేసిన లేఖలో మొత్తం ఐదుగురి తెలుగు దేశం పార్టీ సభ్యత్వాన్ని రద్దు చేస్తున్నట్లు ఎన్టీఆర్ పేర్కొన్నారు. చంద్రబాబునాయుడు, ఆశోక్‌ గజపతి రాజు, విధ్యాదర్‌ రావు, దేవేందర్‌ గౌడ్‌, మాధవ రెడ్డిలను పార్టీనుంచి తొలిగిస్తున్నట్లు పేర్కొన్నారు.
