ఉత్తరాఖండ్ బాధితుల కోసం మహేష్ ప్రార్థనలు

ఉత్తరాఖండ్‌లో ఆదివారం జలప్రళయం సంభవించింది. ఈ ఘటనలో సుమారు 170 మంది గల్లంతయ్యారు. మరో 14 మంది మృతిచెందారు. ఉత్తరఖండ్‌లోని చమోలీ జిల్లా జోషిమఠ్‌లో మంచు చరియలు ఒక్కసారిగా విరిగి పడడంతో గంగానది ఉపనది ధౌలీగంగా నదికి వరద ఒక్కసారిగా పోటెత్తింది. దీంతో ఆ నదిపై నిర్మిస్తున్న పవర్‌ ప్రాజెక్టు ధ్వంసమైంది. ప్రాజెక్టులో ఆసమయంలో పనిచేస్తున్న కార్మికులు, సమీప ప్రజలు దాదాపు 170కి పైగా గల్లంతయ్యారు.

దీంతో వెంటనే రంగంలోకి దిగిన ఇండో టిబెటిన్‌ బార్డర్‌ పోలీసులు(ఐటీబీపీ) సహాయక చర్యలు చేపట్టారు. ఈ ఘటనపై టాలీవుడ్ సూపర్ స్టార్ మహేష్‌ బాబు విచారం వ్యక్తం చేశారు. ఈ ఘటనలో గల్లంతైన వారు క్షేమంగా బయటపడాలని ప్రార్థిస్తున్నట్లు, వారి గురించే ఆలోచిస్తున్నట్లు మహేష్‌ బాబు ట్వీట్‌ చేశారు. ఈ ఘటన జరిగిన వెంటనే సహాయక చర్యలు చేపట్టి పలువురిని కాపాడిన ఐటీబీపీ జవాన్లకు మహేష్‌ బాబు సెల్యూట్‌ చేశారు.

మహేష్ ప్రస్తుతం ‘సర్కారు వారి పాట’ సినిమాతో బిజీగా ఉన్నారు. ఈ చిత్రానికి పరశురామ్ దర్శకుడు. మహేష్ కిజంటగా కీర్తి సురేష్ నటిస్తున్నారు. ప్రస్తుతం ఈ సినిమా షూటింగ్ దుబాయ్ లో జరుగుతోంది. అక్కడి లోకేషన్స్ పిక్స్ ని మహేష్ ఎప్పటికప్పుడు సోషల్ మీడియాలో షేర్ చేస్తున్న సంగతి తెలిసిందే.