పాక్ ప్రధానికి కరోనా పాజిటివ్

ప్రపంచ దేశాల్లో కరోనా మళ్లీ విజృంభిస్తోంది. ఈ క్రమంలో పలువురు ప్రముఖులు కరోనా బారినపడుతున్నారు. తాజాగా పాకిస్థాన్ ప్రధాని ఇమ్రాన్ ఖాన్‌కు కరోనా వైరస్‌ పాజిటివ్‌గా నిర్ధారణ అయింది. ప్రస్తుతం ఆయన ఇంట్లో స్వీయ నిర్బంధంలో ఉన్నారు. ఈ మేరకు జాతీయ ఆరోగ్య సేవలకు సంబంధించి ప్రధానికి ప్రత్యేక సహాయకారిగా ఉన్న ఫైజల్ సుల్తాన్ ట్వీట్ చేశారు.

శుక్రవారమే ఇమ్రాన్ ఖాన్ చైనా టీకా సినోఫాం మొదటి డోసును తీసుకున్నారు. అది తీసుకొని 24 గంటలు కూడా గడవక ముందే ఇమ్రాన్ ఖాన్ కు కరోనా పాజిటివ్ గా  నిర్థారణ కావడం విశేషం. మరోవైపు, పాకిస్థాన్‌లో కరోనా వైరస్ ఉద్ధృతి కొనసాగుతోంది. మొత్తం కేసుల సంఖ్య 6.15లక్షలకు పైబడగా.. మరణాల సంఖ్య సుమారు 13,700కు పైగా చేరినట్టు తెలుస్తోంది.