పవన్ కోసం మహేష్ ప్రార్థనలు
జనసేన అధినేత, పవర్ స్టార్ పవన్ కల్యాణ్ కరోనా బారినపడిన సంగతి తెలిసిందే. ఇటీవల తన వ్యక్తిగత సిబ్బందిలో ఎక్కువమంది కరోనా బారిన పడడంతో పవన్ కొన్నిరోజుల నుంచి స్వీయ నిర్బంధంలో ఉన్నారు. ఈ క్రమంలోనే కొవిడ్‌ పరీక్షలు చేయించుకోగా ఆయనకు పాజిటివ్‌గా నిర్ధారణ అయ్యింది.
ఈ నేపథ్యంలో టాలీవుడ్ ప్రముఖులు, అభిమానులు పవన్ త్వరగా కోలుకోవాలని ఆకాంక్షిస్తున్నారు. ప్రార్థనలు చేస్తున్నారు. ఈ మేరకు సోషల్ మీడియాలో పోస్టులు పెడుతున్నారు. తాజాగా సూపర్ స్టార్ మహేష్ బాబు సైతం పవన్ గురించి ట్విట్ చేశారు. పవన్ త్వరగా కోలుకుని సంపూర్ణ ఆరోగ్యంతో తిరిగి రావాలని తాను ప్రార్థిస్తున్నట్లు మహేశ్‌ పేర్కొన్నారు.
ప్రముఖ కార్డియాలజిస్టు డాక్టర్‌ తంగెళ్ల సుమన్‌ ఆధ్వర్యంలో పవన్‌కు చికిత్స అందిస్తున్నారు. ఊపిరితిత్తుల్లో కాస్త నిమ్ము చేరడంతో యాంటీ వైరల్‌ మందులతో ఆయనకు చికిత్స అందిస్తున్నారు. పవన్ కి కరోనా అని తేలడంతో.. ఆయన కుటుంబ సభ్యులు చిరంజీవి, రామ్ చరణ్, ఉపాసన ప్రత్యేక ఏర్పాట్లు చేసినట్టు తెలిసింది. అపోలో ఆసుపత్రి నుంచి ఓ బృందం పవన్ దగ్గరకి పంపించి.. చికిత్స అందిస్తున్నట్టు తెలిసింది.
