కరోనా విజృంభణతో ఈ నెల 16న రావాల్సిన ‘లవ్ స్టోరీ’, 23న రావాల్సిన ‘టక్ జగదీష్’ సినిమాలు వాయిదా పడిన సంగతి తెలిసిందే. ఆ తర్వాత వారాల్లో రావాల్సిన సినిమాల రిలీజ్ కూడా వాయిదా పడక తప్పని పరిస్థితి. ఈ నేపథ్యంలో సినీ పరిశ్రమకు మరోసారి ఓటీటీనే దిక్కుగా మారనుంది. ఓటీటీల్లోకి సినిమాలు క్యూ కట్టే పరిస్థితులు కనిపిస్తున్నాయి. ఈ క్రమంలో విక్టరీ వెంకటేష్ ‘దృశ్యం2’ ఓటీటీలో రిలీజ్ చేసే ఆలోచనలు జరుగుతున్నట్టు సమాచారమ్.

మలయాళ సూపర్‌స్టార్‌ మోహన్‌లాల్‌ నటించిన ‘దృశ్యం2’ను తెలుగులోనూ రీమేక్‌ చేస్తున్నారు. వెంకటేశ్‌, మీనా జంటగా మాతృకను తెరకెక్కించిన జీతూ జోసెఫ్‌ తాజా చిత్రాన్ని రూపొందిస్తున్నారు. ఇటీవలే షూటింగ్ పూర్తయింది. ఈ సినిమాని ఓటీటీ ద్వారా ప్రేక్షకుల ముందుకు తీసుకొస్తే ఎలా ఉంటుందన్న ఆలోచన చేస్తున్నారట నిర్మాత సురేశ్‌బాబు.దర్శకుడు జీతూ జోసెఫ్‌, వెంకటేశ్‌ కూడా ఓటీటీకే మొగ్గు చూపారని సమాచారం. ఈ నేపథ్యంలో త్వరలోనే దృశ్యం 2 ఓటీటీ రిలీజ్ పై ఓ క్లారిటీ రానుందని తెలుస్తోంది.