మహేష్-రాజమౌళి సినిమా కీలక అప్ డేటు

దర్శకధీరుడు రాజమౌళి ప్రస్తుతం ‘ఆర్ఆర్ఆర్’ సినిమాతో బిజీగా ఉన్నారు. ఆ తర్వాత సూపర్ స్టార్ మహేష్ తో రాజమౌళి సినిమా ఉండనుంది. ఈ చిత్రాన్ని కె.ఎల్‌. నారాయణ నిర్మించనున్నారు. ఆఫ్రికా అడవి నేపథ్యంలో భారీ యాక్షన్ డ్రామాగా ఈ క్రేజీ ప్రాజెక్టును తెరకెక్కిస్తున్నారంటూ ప్రచారం ఊపందుకుంది. తాజాగా దీనిపై నిర్మాత నారాయణ స్పందించారు. 

‘కొన్నేళ్ల క్రితమే మహేశ్‌ బాబు, రాజమౌళి నాతో సినిమా చేస్తానని చెప్పారు. ప్రస్తుతం వాళ్ల మార్కెట్ పెరిగినా ఇచ్చిన మాటకి కట్టుబడి ఉన్నారు. ఈ ప్రాజెక్టు అడవి నేపథ్యంలో సాగే కథ అని వార్తలు వస్తున్నాయి. కానీ, అందులో నిజం లేదు. ఈ చిత్ర కథ ఇంకా ఖరారు కాలేదు. రాజమౌళి, ఆయన బృందం స్క్రిప్టు పనుల్లో ఉంది’ అని నారాయణ తెలిపారు. దీంతో మహేష్-రాజమౌళి సినిమా పనులు అప్పుడే ప్రారంభం అయ్యాయనే క్లారిటీ వచ్చేసింది. ఆర్ ఆర్ ఆర్ రిలీజైన తర్వాత ఈ సినిమాపై జక్కన్న అధికారిక ప్రకటన చేయనున్నారు.