మళ్లీ రిలీజ్ ల జాతర

టాలీవుడ్ లో మళ్లీ రిలీజ్ ల జాతర మొదలు కానుంది. కరోనా ఫస్ట్ వేవ్ లాక్‌డౌన్‌ తర్వాత సినిమాలన్నీ థియేటర్స్ క్యూ కట్టిన సంగతి తెలిసిందే. వారానికో మూడ్నాలుగు సినిమాలు అన్నట్టుగా రిలీజ్ ల జాతర జరిగింది. దాదాపు ఆర్నేళ్ల తర్వాత థియేటర్స్ తిరిగి తెరచుకోవడం.. ప్రేక్షకులు కూడా మునుపటిలా థియేటర్స్ కి వస్తుండటంతో.. ఆ టైమ్ లో సినిమాల జాతర కనిపించింది. ఇప్పుడు సెకండ్ వేవ్ లాక్‌డౌన్‌ తర్వాత కూడా పరిస్థితి అలాగే మారుతోంది. మరోసారి రిలీజ్ ల జాతర మొదలు కాబోతుంది.

కరోనా సెకండ్ వేవ్ తో సమ్మర్ కి రిలీజ్ కావాల్సిన సినిమాలన్నీ ఆగిపోయాయ్. ఇప్పుడు తెలంగాణలో పూర్తిస్థాయిలో లాక్‌డౌన్‌ ని ఎత్తేశారు. రేపో మాపో ఏపీలో లాక్‌డౌన్‌ ని ఎత్తేయనున్నారు. రెండు చోట్ల థియేటర్స్ తిరిగి తెరచుకోనున్నాయ్. అది కూడా వందశాతం ఆక్యుపెన్సీతో నడవనున్నాయి. ఈ నేపథ్యంలో ఇప్పటికే షూటింగ్ పూర్తి చేసుకున్న సినిమాలు, షూటింగ్ చివరి దశలో ఉన్న సినిమాలు రిలీజ్ డేట్స్ ని ప్రకటించుకొనే పనిలో ఉన్నాయ్. ముందుగా ఓ మంచి డేటుని ఎంచుకొని రిలీజ్ డేట్ ని ప్రకటించే పనిలో దర్శక-నిర్మాతలు ఉన్నారు. ఈ క్రమంలో బాలయ్య తాజా చిత్రం అఖండ వినాయక చవితి కానుకగా రాబోతుందని సమాచారమ్.

ఇక లవ్ స్టోరీ, నారప్ప, టక్ జగదీష్.. తదితర సినిమాలు రిలీజ్ డేట్ ని ప్రకటించుకోనున్నాయ్. ప్రస్తుతం ఉన్న పోటీని బట్టీ చూస్తే.. వారానికి కనీసం రెండు మూడు సినిమాలు రిలీజ్ అయ్యే ఛాన్స్ ఉంది. కరోనా మూడో వేవ్ కూడా వచ్చే అవకాశాలున్నాయనే ప్రచారం జరుగుతోంది. ఈ నేపథ్యంలో ఈ గ్యాప్ లో వీలైనన్ని సినిమాలు రిలీజ్ చేసేలా ప్లాన్ చేసుకుంటున్నారు. ఇక భారీ బడ్జెట్ సినిమాలు ఆర్ ఆర్ ఆర్ , కేజీఎఫ్ 2 సినిమాల రిలీజ్ డేట్ పై అతి త్వరలోనే క్లారిటీ రానుందని చెబుతున్నారు.