పవన్ రెమ్యూనరేషన్.. మరో పది పెరిగింది !

చెక్కు చెద‌రని ఇమేజ్ ప‌వ‌న్ సొంతం. ఆయ‌న పారితోషికం సినిమా సినిమాకీ పెర‌గ‌డ‌మే గానీ త‌గ్గ‌డం ఉండ‌దు. ‘వకీల్ సాబ్’ సినిమా కోసం పవన్ రూ. 50కోట్ల పారితోషికం తీసుకున్నాడన్న వార్తలొచ్చాయి. ఆ సినిమాకి ప‌వ‌న్ ఇచ్చిన కాల్షీట్లు చాలా త‌క్కువ‌. అయినా.. పవన్ కి భారీ రెమ్యూనరేషన్ ఇచ్చారు నిర్మాత దిల్ రాజు. అయితే పవన్ పై పెట్టుకున్న నమ్మకం వమ్ముకాలేదు. వకీల్ సాబ్ బ్లాక్ బస్టర్ హిట్ అయింది. భారీ లాభాలని కూడా తెచ్చిపెట్టింది.

ఇప్పుడు మైత్రీ మూవీస్ లో ప‌వ‌న్ ఓ సినిమా చేయ‌బోతున్నాడు. హ‌రీష్ శంక‌ర్ ద‌ర్శ‌కుడు. ఈసినిమా కోసం ప‌వ‌న్ కి రూ.60 కోట్ల పారితోషికం ఇస్తున్నారట. అంటే.. ప‌వ‌న్ పారితోషికాన్ని మైత్రీ మ‌రో ప‌ది కోట్ల‌కు పెంచింది అన్నమాట. ఈ సినిమా కోసం పవన్ ఇంకొన్ని ఎక్కువ కాల్షీట్లు ఇవ్వాల్సి ఉంది. ఇక ఈ సినిమా కోసం ‘భవధీయ – భగత్ సింగ్’ టైటిల్ ప్రచారంలో ఉంది. గబ్బర్ సింగ్ తర్వాత పవన్-హరీష్ కాంబోలో వస్తున్న సినిమా కావడంతో.. ఈ సినిమాపై ప్రేక్షకుల్లో భారీ అంచనాలున్నాయి.

ఈ సినిమా విషయంలో దర్శకుడు హరీష్ కు పవన్ ఓ కండిషన్ కూడా పెట్టాడట. వీలైంత త్వరలో సినిమా షూటింగ్ ని పూర్తి చేయాలని కోరాడట. ఎందుకంటే ప‌వన్ చేతిలో చాలా ప్రాజెక్టులు ఉన్నాయి. హరీష్ శంకర్ సినిమా తర్వాత సురేందర్ రెడ్డి దర్శకత్వంలో ఓ సినిమా చేయాల్సి ఉంది. ఇదీగాక.. మరిన్ని ప్రాజెక్టులు చర్చల దశలో ఉన్నాయట.