83 సీక్వెల్ 11

టీమిండియా మాజీ కెప్టెన్ కపిల్ దేవ్ బయోపిక్ ’83’ రిలీజ్ కి రెడీ అయింది. ఈ వారమే (డిసెంబర్ 24) ప్రేక్షకుల ముందుకు రానుంది. 1983లో క‌పిల్ సేన సాధించిన విఖ్యాత విజ‌యం పై సినిమా తెరకెక్కింది. క్రికెట్ అంటే ఇంత విప‌రీత‌మైన ఆద‌ర‌ణ లేని రోజుల్లో, క్రికెట్ అంటే డ‌బ్బుకు ప‌ర్యాయ‌ప‌దంగా మార‌ని రోజుల నాటి.. అద్బుత విజ‌య‌గాథ‌ను ఎలా చూపిస్తార‌ని సినీ, క్రికెట్ ప్రియులు ఆసక్తిగా ఎదురు చూస్తున్నారు. ఒక సినిమాకు కావాల్సినంత బోలెడంత ముడి స‌ర‌కు ఆ కాన్సెప్ట్ లో ఉంది.

మరోవైపు ’83’ సీక్వెల్ ’11’ రాబోతుందంటూ సోషల్ మీడియా వేదికగా అప్పుడే ప్రచారం మొదలైంది. ’83’ హిట్ అయితే.. దానికి సీక్వెల్ గా 2011 టీమిండియా ప్ర‌పంచ‌క‌ప్ సాధించిన వైనంపై కూడా ఒక సినిమా రెడీ కావొచ్చు. అదే జరిగితే మరో ధోని బయోపిక్ వచ్చినట్టు అవుతుంది. అయితే క‌పిల్ సేన విజ‌యంలో ఉన్నంత స‌ర్ ప్రైజ్ 2011లో ప్ర‌పంచ‌క‌ప్ విజ‌యంలో లేదు. స్వ‌దేశంలో ప్ర‌పంచ‌క‌ప్ జ‌ర‌గ‌డంతో స‌హా అనేక పాజిటివ్ అంశాలున్నాయి 2011 ప్ర‌పంచ‌క‌ప్ విజ‌యంలో. 1983 ప్ర‌పంచ‌క‌ప్ విజ‌యంలో ఉన్నంత స‌ర్ ప్రైజ్, డ్రామా.. 2011లో లేదు. అయితే బాలీవుడ్ ద‌ర్శ‌కులు అనుకుంటే.. అలాంటి దాన్ని సృష్టించ‌గ‌ల‌రు.