నిజమే.. పాక్ అదుపులో భారత పైలట్ !
భారత వాయుసేనకు చెందిన ఒక పైలట్‌ను అదుపులోకి తీసుకొన్నట్లు పాకిస్థాన్‌కు ఇంటర్‌ సర్వీస్‌ పబ్లిక్‌ రిలేషన్స్‌ డీజీ ఆసీఫ్‌ గఫూర్‌ ప్రకటించిన సంగతి తెలిసిందే. దీనికి సంబంధించినదిగా చెబుతున్న వీడియో ఒకటి సోషల్‌మీడియాలో వైరల్‌ అయింది. వింగ్‌ కమాండర్‌ విక్రమ్‌ అభినందన్‌ అనే పైలట్‌ను అదుపులోకి తీసుకున్నట్లు పాక్ తెలిపింది. ఐతే, ఈ విషయాన్ని భారత్ మొదట్లో ఖండించినా.. ఇప్పుడు అంగీకరించినట్టు తెలుస్తోంది.
కొద్దిసేపటిక్రితమే.. భారత విదేశాంగ శాఖ అధికార ప్రతినిధి రవీష్‌ కుమార్‌ మీడియాతో మాట్లాడారు. సరిహద్దులో పాక్ యుద్ధ విమానాన్ని భారత దళాలు కూల్చివేశాయని తెలిపారు.ఈ క్రమంలో మిగ్‌-21 బైసన్‌ విమానాన్ని భారత్ కోల్పోయిందని ఆయన చెప్పారు. మిగ్‌ పైలట్ తమ అదుపులో ఉన్నారని పాక్ చెప్పినట్లు రవీష్‌ వెల్లడించారు. దీంతో.. భారతపైలైట్ తమ అదుపులో ఉన్నాడని ప్రకటించిన పాక్ ప్రకటన నిజమైనట్టయింది.
