‘జెర్సీ’ నాని కోసం రాసుకొన్న కథ కాదు !

‘జెర్సీ’ సినిమాతో మరో ప్రతిభ గల దర్శకుడు వెలుగులోకి వచ్చాడు. గౌతమ్‌ తిన్ననూరి దర్శకత్వంలో నాని-శ్రద్దా శ్రీనాథ్ జంటగా నటించిన చిత్రం జెర్సీ. శుక్రవారం ప్రేక్షకుల ముందుకొచ్చి జెర్సీని మెగా బ్లాక్ బస్టర్ హిట్ గా తేల్చేశారు ప్రేక్షకులు. ప్రేక్షకులు, సినీ స్టార్స్ నుంచి జెర్సీ ప్రశంసలు అందుకుంటోంది. తారక్, బన్నీ.. జెర్సీని చూసి ఫిదా అయ్యారు. గౌతమ్‌ సినిమాని గొప్పగా తీశాడని కితాబిచ్చారు. ఇక సినిమా ప్రీ-రిలీజ్ వేడుకకు సైతం హాజరుకాని గౌతమ్‌ తిన్ననూరి తొలిసారి సినిమాపై స్పందించారు.

శనివారం జెర్సీ సక్సెస్ మీట్ లో గౌతమ్‌ మాట్లాడారు. “ఈ కథను నానిని దృష్టిలో పెట్టుకుని రాయలేదు. నేను రాసుకున్న స్క్రిప్ట్‌ పూర్తయ్యాకే అది ఎవరికి సరిపోతుందనేది ఆలోచించుకుంటా. ఈ కథ రాసుకున్నాక రెండు మూడేళ్ల వరకు నా దగ్గరే ఉంది. ఎవరికీ చూపించలేదు. నా దగ్గరున్న కథల్లో నాకెంతో నచ్చిన స్క్రిప్ట్‌ కూడా ఇదే. నాని అంచనాలెప్పుడూ పైస్థాయిలోనే ఉంటాయి. ఆయనకి కథల విషయంలో మంచి అనుభవం ఉంది. సినిమా మెగా బ్లాక్ బస్టర్ హిట్ అవుతుందని నాని ముందే చెప్పారు’ అన్నారు.