విమానంలో అగ్నిప్రమాదం : 41మంది మృతి
రష్యా రాజధాని మాస్కోలో ఎరోఫ్లాట్‌ విమానయాన సంస్థకు చెందిన విమానంలో అగ్ని ప్రమాదం చోటుచేసుకుంది. ఈ ఘటనలో 41మంది మృతిచెందారు. ఇందులో ఇద్దరు చిన్నారులు కూడా ఉన్నారు. మరో ఆరుగురు గాయపడినట్లు ఈ ఘటనపై విచారణ జరుపుతున్న విచారణ కమిటీ వెల్లడించింది.
విమానం టేకాఫ్‌ అయిన కొద్దిసేపటికే ఈ ప్రమాదం సంభవించింది. విమానం వెనకభాగంలో ఒక్కసారిగా మంటలు చెలరేగడంతో మాస్కోలోని షెరెమెత్యోవో విమానాశ్రయంలో అత్యవసరంగా దించివేశారు. సిబ్బందితో కలిపి 78 మంది ప్రయాణికులు విమానంలో ఉన్నారు. మిగిలిన 37 మంది ప్రాణాలతో బయటపడ్డారు. ఈ ఘటనపై రష్యా ప్రభుత్వం దర్యాప్తు కమిటీని నియమించింది.
అగ్నిప్రమాదం సంభవించడానికి గల కారణాలతో పాటు భద్రతా నియమాలను పైలట్లు ఏమైనా ఉల్లంఘించారా ? వంటి అంశాలపై దర్యాప్తులో తేలనున్నాయి. ప్రత్యక్ష సాక్షులు, బాధితులు, ఎయిర్‌పోర్ట్‌ సిబ్బంది తదితరులను ఈ కమిటీ విచారించనుంది.
