అమెరికాలో మళ్లీ కాల్పుల కలకలం

అగ్రరాజ్యం అమెరికాలో మరోసారి కాల్పుల కలకలం చోటుచేసుకుంది. కొలరాడో రాష్ట్రం డెన్వర్‌లోని ఓ పాఠశాలలోకి చొరబడిన ఇద్దరు దుండగులు కాల్పులకు తెగబడ్డారు. ఈ ఘటనలో ఒక విద్యార్థి మృతి చెందగా.. ఎనిమిది మంది తీవ్రంగా గాయపడినట్లు అధికారులు తెలిపారు. క్షతగాత్రులను సమీపంలోని ఆసుపత్రికి తరలించి చికిత్స అందిస్తున్నారు.

మంగళవారం మధ్యాహ్నం 2గంటలకు ఈ ఘటన చోటుచేసుకుంది. కాల్పులకు పాల్పడింది తోటి విద్యార్థులే అయి ఉంటారని భావిస్తున్నారు. గత నెల రోజులుగా దేశంలో ఎక్కడో ఓ చోట కాల్పుల ఘటనలు నమోదవుతూనే ఉన్నాయి. ఇటీవల ఓ విశ్వవిద్యాలయంలో జరిగిన కాల్పుల్లో ఇద్దరు విద్యార్థులు మృతి చెందిన విషయం తెలిసిందే. అలాగే వెస్ట్‌ బాల్టిమోర్‌, శాండియోగోలోనూ దుండగులు కాల్పులకు దిగడంతో పదుల సంఖ్యలో ప్రాణాలు కోల్పోయారు.