23 స్క్రిప్ట్ సూపర్ హిట్

ఏపీ రాజకీయాల్లో 23 స్క్రిప్ట్ మెగా బ్లాక్ బస్టర్ హిట్ అయింది. 23 స్క్రిప్టుని స్వయంగా దేవుడే చంద్రబాబు కోసం రాశాడని జగన్ అన్నారు. శనివారం వైకాపా అధినేత జగన్‌ పార్టీ శాసనసభా పక్ష నేతగా ఎన్నికయ్యారు. తాడేపల్లిలోని వైకాపా క్యాంపు కార్యాలయంలో జరిగిన ఈ భేటీలో ఎమ్మెల్యేలు ఆయన్ను ఏకగ్రీవంగా ఎన్నుకున్నారు. ఈ సందర్భంగా జగన్‌ పార్టీ నేతలనుద్దేశించి మాట్లాడారు.

“అన్యాయం, అధర్మం చేస్తే దేవుడు తప్పక శిక్షిస్తాడు. వైకాపా నుంచి అక్రమంగా 23 మంది ఎమ్మెల్యేలను లాక్కున్నారు. అయితే ఇప్పుడు తెదేపాలో 23 మంది మాత్రమే ఎమ్మెల్యేలుగా గెలిచారు. మే 23నే చంద్రబాబుకు దేవుడు తగిన బుద్ధి చెప్పాడు. 23 సంఖ్యతో దేవుడు గొప్పగా స్క్రిప్ట్ రాశాడు” అని చెప్పుకొచ్చాడు. ఇక, ఏపీ అసెంబ్లీ ఎన్నికలో వైకాపా ఏకంగా 151స్థానాలని గెలుచుకొన్న సంగతి తెలిసిందే. తెదేపా 23, జనసేన ఒక్క స్థానానికి పరితమయ్యాయి. ఈ నెల 30న జగన్ ఏపీ ముఖ్యమంత్రిగా ప్రమాణం చేయబోతున్నారు.