ఆ ఎఫెక్ట్ నుంచి బన్నీ ఇంకా బయటపడలే.. !
స్టయిలీష్ స్టార్ అల్లు అర్జున్ అభిమానులకి మరోసారి సంజాయిషి ఇచ్చుకొన్నారు. ‘నా పేరు సూర్య’ తర్వాత చాలా గ్యాప్ తీసుకొన్న సంగతి తెలిసిందే. ఈ సినిమా తర్వాత విక్రమ్ కె కుమార్ దర్శకత్వంలో ఓ సినిమా అనుకొన్నారు. కొన్ని కారణాల వలన ఆ సినిమా క్యాన్సిల్ అయింది. ఆ తర్వాత త్రివిక్రమ్ తో సినిమా ప్రకటించినా.. అది మొదలవ్వడానికి చాలా టైంనే పట్టింది. మరోవైపు, త్వరగా సినిమా చేయమని అభిమానుల నుంచి బన్నీకి ఒత్తిడి ఎదురైంది. ఆలస్యంపై ఒకట్రెండు సార్లు బన్నీ అభిమానులకి సారీ చెప్పాడు కూడా. అయినా.. ఆలస్యంపై అభిమానులు అలకలోనే ఉన్నట్టు బన్నీ భావించినట్టు ఉన్నాడు.
ఈ నేపథ్యంలోనే త్రివిక్రమ్ సినిమా టైటిల్ టీజర్ లోనూ గ్యాప్ తీసుకోవడంపై బన్నీ స్పందించారు. ఈ సినిమాకు ‘అల.. వైకుంఠపురములో ‘ టైటిల్ ని ప్రకటించారు. ‘ఏంట్రోయ్‌ గ్యాప్ ఇచ్చావ్‌’ అని మురళీ శర్మ అడిగితే ‘ఇవ్వలా… వచ్చింది’ అంటూ అల్లు అర్జున్ చెప్పే డైలాగ్‌ని ఈ టీజర్‌లో వినిపించారు. తండ్రీకొడుకుల అనుబంధం నేపథ్యంలో సాగే చిత్రమిది. నాయిక పేరు అలకనంద. వైకుంఠపురం నేపథ్యంలో సాగుతుంది. అందుకే ‘అల వైకుంఠపురములో’ అనే పేరు నిర్ణయించినట్టు తెలుస్తోంది.
ఈ చిత్రంలో బన్నీకి జంటగా పూజా హెగ్డే నటిస్తున్నారు. బాలీవుడ్ సీనియర్ హీరోయిన్ టబు కీలకలో నటిస్తున్నారు. తమన్‌ సంగీతం అందిస్తున్నారు. గీతా ఆర్ట్స్, హారిక & హాసిని క్రియేషన్స్ సంయుక్తంగా నిర్మిస్తున్నాయి. వచ్చే యేడాది సంక్రాంతి కానుకగా సినిమాని ప్రేక్షకుల ముందుకు తీసుకురానున్నారు.
