టీజర్ మాత్రమే కాదు.. సినిమాలోనూ పవన్ !

మెగా అభిమానులకి గుడ్ న్యూస్. ‘సైరా’ సినిమాలోనూ పవన్ గొంతు వినిపించనుంది. సైరా టీజర్ కోసం పవన్ కల్యాణ్ వాయిస్ ఓవర్ అందించిన సంగతి తెలిసిందే. “చరిత్ర స్మరించుకొంటూ.. ఝాన్సీ లక్ష్మీ భాయ్, చంద్రశేఖర్ ఆజాద్, భగత్ సింగ్ లాంటి ఎందరో మహానీయులు ప్రాణ త్యాగాలున్నాయి. కానీ, ఆ చరిత్ర పుటల్లో కనుమరుగయ్యాడు ఒక వీరుడు. ఆంగ్లేయులపై తొలిసారి యుద్ధభేరి మ్రోగించిన రేనాటి సూర్యుడు.. ” అంటూ పవన్ చెప్పిన వాయిస్ ఓవర్ తో సైరా టీజర్ ప్రారంభం అయింది.

సైరా సినిమాలో కూడా పవన్ గొంతు వినిపించనుంది. ఈ విషయాన్ని స్వయంగా చిరంజీవి బయటపెట్టారు. మంగళవారం ముంబైలో జరిగిన సైరా టీజర్ లాంఛ్ లో మాట్లాడిన చిరంజీవి.. సినిమాలో కూడా పవన్ కల్యాణ్ వాయిస్ ఓవర్ ఉంటుందని క్లారిటీ ఇచ్చేశారు.
ఇక, సైరా తమిళ వెర్షన్ కు కమల్ హాసన్, మలయాళం వెర్షన్ కు మోహన్ లాల్ వాయిస్ ఓవర్ ఉంటుందని చిరు తెలిపారు. సినిమా ప్రారంభంలో వచ్చే ఇంట్రడక్షన్, క్లైమాక్స్ లో వచ్చే సన్నివేశాల్లో ఈ వాయిస్ ఓవర్లు వినిపిస్తాయని చెప్పారు.

సురేందర్ రెడ్డి దర్శకత్వంలో ‘సైరా’ తెరకెక్కింది. తొలితరం స్వాత్రంత్య్ర సమరయోధుడు ఉయ్యాలవాడ నరసింహారెడ్డి జీవితకథ ఆధారంగా తెరకెక్కిన చిత్రమిది. ఉయ్యాలవాడ నరసింహారెడ్డిగా చిరు, ఆయన గురువు పాత్రలో బిగ్ బీ అమితాబ్ నటించారు. నయనతార, తమన్నా, అనుష్క, విజయ్ సేతుపతి, కిచ్చ సుధీప్, జగపతి బాబు తదితరులు కీలక పాత్రలో నటించారు. అక్టోబర్ 2న సైరా ప్రేక్షకుల ముందుకు రానుంది.

c